Ասլըհան Քիրամիջյան. կորուսյալ հայուհին Դերսիմի

«Դերսիմի կոտորածի ականատեսներից 80-ամյա հայուհի Ասլըհանը 5-6 տարեկանում հանձնվել էր մի ընտանիքի` ստանալով Ֆաթմա անունը և շրջապատի կողմից որպես քուրդ ճանաչվելով: Նա տարիներ անց ի հայտ եկած դերսիմցի կորուսյալ մի հայուհի էր»:

Նման տողերով է սկսում թուրքական ձախաթևյան «Ռադիքալ» պարբերականը Ասլըհան-Ֆաթմայի պատմությունը, ով վերջերս դիմել էր Թուրքիայի Ազգային մեծ ժողով` պաշտոնական ներողություն պահանջելով իր տեսած տանջանքների և ցավերի համար:

«Հալիվորի Վանք գյուղում բոլոր մարդիկ սպանվեցին: Փոքրիկ Ասլըհանը կարողացավ «զինված մի մարդու» հետ թաքնվել, սակայն տեսավ գյուղացիների կոտորածը:

Կոտորածին հետևեց աքսորը: Փոքրիկը Ըհսա Քիրամիջյանի և երեք զարմիկների հետ աքսորվեց Քոնյա նահանգի Բեյշեհիր շրջան: 5-6 տարեկանում նա դարձավ թուրք Ֆաթմա, իսլամացվեց և ընդամենը 13 տարեկանում ամուսնացավ: Նրա եղբայրներն էլ թլպատվեցին:

Տարիներ ի վեր հայուհի լինելը թաքցնում էին: Հոր Հակոբ անունը դարձավ Էյուփ, Հավաս մայրը` Հավա: Մինչ 2010 թվականը բոլորը նրան որպես քուրդ էին ճանաչում, անգամ երեխաները:

Ասլըհանը Հալիվոր Վանքի 72-ամյա լռությունը խախտեց, ինչից հետո նրա զավակները սկսեցին ուսումնասիրել նրա արմատները: Նրանք գտան ազգականների, նրա ճակատագիրը կիսած մարդկանց:

Կինը պատմում է իր կյանքից, ցույց տալիս վնասված ձեռքերը: Նրան հանձնել էին մի կնոջ, որի ընտանիքը շատ դաժան էր վարվել նրա հետ: Նրանց ծեծից վնասվել էր մատերը:

Ավելի ուշ մեկ այլ ընտանիքի հանձնեցին: 13 տարեկանում ամուսնացրեցին 35 տարեկան մի տղամարդու հետ: Սոված-ծարավ մի կյանք ապրեց` լի տանջանքներով: Անտեր, անտուն, առանց մեկի ապրեց: Փողոցում մնաց: Երեխաներին այդպես մեծացրեց:

«1995 թվականին երեխաներս ասացին, որ հայ եմ»,-նշում է կինը` վախենալով, որ ասում է` հայ է:

«2010 թվականին աղջիկս մեր տոհմածառը կազմեց: Անձնագրում անունս Ֆաթմա է, օրիորդական ազգանունս` Քիրեմիթչի: Իմացա, որ անունս Ասլըհան է, ազգանունս` Քիրամիջյան: Հայրս ծառայել է Հալիվորի Վանքում: Բավական մեծ կարողություն է ունեցել: Նա էլ աքսորի ժամանակ է սպանվել:

Այժմ Ասըլահն Քիրամիջյանը դիմել է Թուրքիայի Ազգային մեծ ժողովին` պահանջելով ներողություն խնդրել իր կրած բոլոր տանջանքների համար, ինչպես նաև հետ պահանջելով հոր ունեցվածքը:

Ահա այսպիսին է Դերսիմի կորուսյալ մի հայուհու պատմությունը, գրում է «Ռադիքալը»:

http://haynews.am/hy/derism