Կրոնափոխ եղած ծպտյալ հայերը վերջին շրջանում շարունակում են Թուրքիայում բարձրաձայնել իրենց ծագման մասին: Միհրան Փըրկիչը, ով ևս պատկանում էր ծպտյալ հայերի թվին, երկու տարի առաջ հրաժարվել էր նախկին` Սելահաթդին մուսուլմանական անունից և եկեղեցում կնքվելով` դարձել էր քրիստոնյա: Խոսելով թուրքական լրատվամիջոցի ներկայացուցչի հետ` Միհրանը նշել է, որ ժամանակակից Թուրքիայում կան մեծ թվով ծպտյալ հայեր, որոնք վախենում են բարձրաձայնել իրենց ծագման մասին:
Ինչպես հաղորդում է «Արմենպրես»–ը, Միհրանը կոչ է արել Թուրքիայում բնակվող և իրենց ծագումը թաքցնող հայերին «վերադառնալ սեփական արմատներին»:
Միհրանը խոսել է նաև այն փաստի մասին, որ Թուրքիայի Հանրապետության հիմնադիր Մուստաֆա Քեմալի հիմնադրած Ժողովրդահանրապետական կուսակցության ներկայիս առաջնորդ Քեմալ Քըլըչդարօղլուն ունի հայկական ծագում: Միհրանը հայտարարել է, որ Քըլըչդարօղլուի մոր հայկական ծագումը կասկած չի հարուցում, սակայն նա նախընտրում է հերքել այդ փաստը: «Քըլըչդաչօղլուի ծննդավայրը` Նազըմիեն, հայտնի է որպես հայերով բնակեցված վայր: Քըլըչդարօղլուն, հերքելով այս ամենը, վիրավորում է սեփական մորը»,- ասել է Միհրան Փըրկիչը:
Leave a Reply