Թուրքական «Ռադիկալ» թերթն անդրադարձել է Երեւանում գտնվող Հայոց ցեղասպանության թանգարան միլիոնավոր այցելուների հետ տարեց տարի թուրքերի այցելությունների թվի աճին: Ինչպես հաղորդում է «Արմենպրես»–ը, թերթը գրում է, որ Հրանտ Դինքի հիմնադրամի կազմակերպմամբ Թուրքիայից ժամանած լրագրողների խումբն այցելել է Ցեղասպանության թանգարան: Այստեղ նրանց հետաքրքրող հարցերին պատասխանել է Հայոց ցեղասպանության թանգարան-ինստիտուտի տնօրեն Հայկ Դեմոյանը: Նա ասել է, որ 2008 թ. հետո թանգարան այցելող թուրքերի թիվը տարեցտարի ավելանում է, եւ այս տարի արդեն թանգարան են այցելել 100-ից ավելի թուրքեր:
Ըստ թուրքական թերթի` Դեմոյանն ասել է, որ Հայոց ցեղասպանության թանգարանում բաժին է բացվելու` ցեղասպանության ժամանակ հայերին օգնած թուրքերի մասին: «Ցուցանմուշների` հավատալի եւ վստահելի լինելու մասին Թուրքիայից եկած այցելուների կասկածներն անմիջապես փարատվում են: 10 թուրք այցելուներից 9-ը թանգարանից հեռանում են` համոզված ցեղասպանության իրողության մեջ: Բազմաթիվ թուրքեր իրենց զգացմունքների մասին գրառումներ են կատարում թանգարանի հուշամատյանում: Ստամբուլցի ապագա մի երիտասարդ ճարտարագետ, չկարողանալով զսպել իրեն, արտասվել է եւ առանց մեկնաբանությունների հեռացել: Սա ոչ թե հայկական պատմությունը բացատրող, այլ իրականում թուրքերի եւ հայերի հիշողություններն ու անցյալը բացատրող թանգարան է: Թանգարանում բացվելու է ցեղասպանության ժամանակ հայերին օգնած թուրքերի մասին բաժին: Հայերին օգնած թուրքերը վտանգել են իրենց կյանքը, քանի որ ցեղասպանության ժամանակ որոշում էր ընդունվել հայերին օգնողներին պատժելու մասին եւ փակցվել բոլոր բնակավայրերում», – գրված է թերթում:
http://armenpress.am/arm/news/691285/hayoc-cexaspanutyan-tangaran-ays-tari–100-ic-aveli-turqer.html
Leave a Reply