Դերսիմի կորուսյալ հայ աղջիկն իր կորած տարիներն է պահանջում

Դերսիմի հանձնաժողովին նամակ հղած 80 տարեկան Ֆաթմա Յավուզը գրավոր ներողության փաստաթուղթ է պահանջում:

Դերսիմի կոտորածից հետո ընտանիքից խլված և Կոնիայի Բեյշեհիրում բնակվող մի սպայի ընտանիքին որպես «որդեգիր» հանձնված Ֆաթմա Յավուզը, ով հիմա 80 տարեկան է, ԹԱՄԺ-ի Դերսիմի ենթահանձնաժողովին ուղարկած իր նամակում պատմում է մի սարսափելի ողբերգության մասին: Յավուզը հետևյալ կերպ է ներկայացնում, թե ինչպես է մեկ տարեկան հասակում խլվել իր ընտանիքից, ուղարկվել Բեյշեհիր ու մեծ տառապանքներ կրել այն ընտանիքներում, որոնց մոտ ապրել է որպես ծառա. «Նախ մի սպա ինձ վերցրեց իր մոտ: Երբ նա նշանակում ստացավ, ինձ հանձնեցին Գրանցումների գրասենյակի տնօրենին: Ինձ շատ էին ծեծում: Մատներս կոտրված են փայտի հարվածներից: Ինձ երբեք բժշկի չեն տարել: Հետագայում ինձ իր մոտ վերցրեց մեկ ուրիշ ընտանիք: Այստեղ էլ շատ տառապանքներ կրեցի: 13 տարեկանում ինձ ամուսնացրին 35 տարեկան մեկի հետ: Կյանքս անցկացրել եմ սոված, ծարավ և տառապանքներով»:

Յավուզը հայտնելով, որ 1995 թ. դստեր ապահովագրությունից օգտվելու նպատակով կատարված պաշտոնական ձևակերպումների ժամանակ բացահայտվել է իր «հայկական» ծագումը, որը 57 տարի շարունակ թաքցրել էր, նաև նշել է, թե իր իրական անունն իմացել է 78 տարեկանում միայն: Յավուզը դարձյալ ընդգծելով, թե տառապանքներով լի կյանք է անցկացրել, հայտնել է, որ վարչապետ Էրդողանի մոտեցումը Դերսիմի խնդրին հուսադրել է իրեն: Յավուզը նաև խնդրել է օգնել` իրեն ներողության գրավոր փաստաթուղթ տրամադրելու, իր հողատարածքը վերադարձնելու և մյուս ազգականներին գտնելու հարցում:

Գտնվել է փաստաթուղթ, ըստ որի` 649 հոգի սպանվել են

Թունջելիի (Դերսիմի պաշտոնական անվանումը-Ակունքի խմբ.) նահանգապետարանը Դերսիմի կոտորածից հետո ողջ մնացած զոհերին գտնելու համար իր մեկնարկած աշխատանքների արդյունքում հասու է եղել մի վավերագրի, համաձայն որի` սպանվել են 649 հոգի: Նահանգապետ Մուստաֆա Թաշքեսենը նշել է. «2012 թ. մայիսի 11-ին նամակներ ենք գրել գյուղապետերին, գավառապետերին և թաղապետերին: Խոզաթից ստացված վավերագրերի միջից կարողացանք մի փաստաթուղթ գտնել, որը հայտնում է այն 649 հոգու մահվան մասին, ովքեր սպանվել են 1938 թ. գործողությունների շրջանակներում»:

http://www.stargazete.com/politika/dersimin-ermeni-kayip-kizi-kaybolan-yillarini-istiyor/haber-571903

Թարգմանությունը` Akunq.net-ի