ՊԿԿ-ն հայկական ահաբեկչական շարժում է

Մեհմեթ Շևքեթ Էյգի

Երկու ինքնություն ունեցողները, երկու կրոն դավանողները, երկվությունները Թուրքիայի մեծ խնդիրներից են: Ենթադրվում է, թե մեր երկրում առկա են մեկ ու կես միլիոն ծպտյալ հրեաներ և դարձյալ մեկ ու կես միլիոն ծպտյալ հայեր: Հայտնի չէ, թե նրանցից որքանն են ուծացվել, և որքանը` հավատարիմ մնացել իրենց գաղտնի ինքնությանը:

ՊԿԿ-ն արտաքուստ քրդական շարժում է թվում, բայց կան ենթադրություններ, որոնց համաձայն` այն հայկական շարժում է: Արդյոք ճի՞շտ է այդ ենթադրությունները բանի տեղ չդնելը և աչքաթող անելը: ՊԿԿ-ն թուրքիացի քրդերի շահերին ծառայու՞մ է, թե՞ նրանց գլխին փորձանք է բերում: Հայերն Արևելյան Անատոլիայից պահանջում են այսօրվա Հայաստանից 5 անգամ ավելի մեծ տարածք: Նայե’ք akunq.net (Արևմտյան Հայաստան) կայքը. աչքներդ ձեր ճակատին կթռնի: ՊԿԿ-ն հայերի հենց այս նպատակներին է ծառայում:

Իսկ ո՞րն է քրդերի համար ամենահարմար ֆորմուլան. այս երկիրը թուրքերի և այլ էթնիկ տարրերի հետ միասին եղբայրաբար կիսելը և խաղաղության մեջ ապրելը:

1912 թ. մինչև 1918 թ. Օսմանյան պետությունը շատ մեծ տարածքների տեր էր: Կայսրության հետ հաշվեհարդար տեսան, և մնաց այսօրվա փոքր Թուրքիան:

Հայերն Օսմանյան պետության սահմաններում բնակվում էին շատ ընդարձակ տարածքում: Նրանք չընդունեցին երկիրը կիսելու գաղափարը, ասացին` թող երկրի մի մասը լրիվ մերը լինի, և պարտվեցին խաղը: Նախկինում, լավ թե վատ, գոյություն ունեին, իսկ հիմա չկան:  

Կառավարության գործն է` ապացուցել, որ ՊԿԿ շարժումը գաղտնի հայկական շարժում է: Մեր պետությունը հետախուզություն ունի, կարող է այդ գործի համար բյուջե տրամադրել, լավ մասնագետներ ունի իր տրամադրության տակ:

Մեր ժողովուրդը պետք է իրազեկվի, որ ՊԿԿ-ն ոչ թե քրդական, այլ հայկական ահաբեկչական շարժում է:

Այսօր թուրքական անվամբ և մուսուլմանի ինքնությամբ հանդես եկող քանի՞ մարդ կա, որ ծպտյալ հայ է:

Ոչ մի մուսուլման քուրդ չի ցանկանա այս երկրի մասնատումը, այս նավի խորտակումը: Այս պահին Ստամբուլը Դիարբեքիրից ավելի շատ քուրդ բնակչություն ունի: Մեր միլիոնավոր քուրդ քաղաքացիներն ապրում են Արևմտյան Անատոլիայի քաղաքներում:  

Թուրքերը, քրդերը, չերքեզները, վրացիները, ալբանացիները, բոսնիացինրը և դեռ քանի էթնիկ արմատներ ունեցողներ կիսում են այս հողերը:

Մեզ հասարակական խաղաղություն և փոխհամաձայնություն է պետք:

Ես հետևյալն եմ փափագում. ԶԼՄ-ներում ՊԿԿ-ի մասին խոսելիս թող ասվի` հայկական ՊԿԿ շարժում:

Նաև ուզում եմ հետևյալի մասին հայտնել. ես ոչ մի ասելիք չունեմ մեր երկրում մեկ ինքնությամբ ապրող հայերի դեմ: Երկու ինքնություն ունեցող ոչ բոլորին եմ նաև մեղադրում: 1915-1918 թթ. չորի կողքին թացն էլ է այրվել: Ես Թուրքիայի ամբողջականության պահպանման պայմանով կողմնակից եմ արդարության և մարդկայնության վրա հիմնված լուծման:

Մինչև 1924 թ. Անատոլիայում և Թրակիայում միլիոնավոր հույներ էին ապրում: «Մեգալի Իդեայի» (հունարեն` «Մեծ գաղափար»-հունական գաղափար, որը կիրառության մեջ է դրվել օսմանյան սուլթան Մեհմեթ Երկրորդ Ֆաթիհի` Կոնստանդնուպոլիսը գրավելուց և Բյուզանդական կայսրության կործանումից հետո: Գաղափարի հիմքում ընկած է Հելլենական կայսրության վերստեղծումը` նախկինում Բյուզանդիային պատկանած բոլոր տարածքները վերստին գրավելու միջոցով-Ակունքի խմբ.) մասին երազանքներն ու նպատակները տեղիք տվեցին նրանց կործանմանը: Իզմիրի (Զմյուռնիա) մետրոպոլիտը` օսմանահպատակ Հրիստոմոսը, կրոնական արարողությամբ դիմավորեց և օրհնեց զավթիչ ու թշնամի հունական բանակին: Մեծ սխալ էր գործել, և հույները պարտվեցին: Նրանք կային այս տարածքներում, բայց անհետացան: Գոյատևելու համար պետք է օսմանահունական լեգեոններ հիմնեին և մարտնչեին հունական ուժերի դեմ: Սակայն այդքան խելք չունեցան:

Հայաստանը պետք է հաշտվի Թուրքիայի հետ: Հենց իր շահերն են դա պահանջում: Հայաստանը Թուրքիայի հետ այնքան հաշտ պետք է լինի, որ սահմանները խորհրդանշական վիճակի հասցվեն, անձնագրերը և վիզային ռեժիմը վերացվեն, երկու երկրների ժողովուրդներն էլ առանց վիզայի կարողանան շրջել միյանց երկրներում: Ափսոս, որ հայերն այդքան խելք չունեն դա իրագործելու համար:

Նրանք նաև պետք է ադրբեջանցիներին վերադարձնեն Լեռնային Ղարաբաղը և հաշտվեն ադրբեջանցիների հետ:

Ես ինքս մի մուսուլման եմ, ով առաքինի քրդին նախընտրում է անբարոյական թուրքից: Պաղատում եմ իմ քուրդ եղբայրներին. մի’ ընկեք ՊԿԿ-ի անվան տակ պատսպարված հայերի ծուղակը, խուսափե’ք այն բացասական երևույթներից, որոնք կարող են խորտակել մեր նավը:

Այս հայրենիքը բոլորինս է:

http://www.habervaktim.com/yazar/pkk-bir-ermeni-teror-hareketidir-50274.html

Թարգմանեց Մելինե Անումյանը

Akunq.net