Անկարայի լավատեսությունն ու անհանգստությունը` կապված Ֆրանսիայի նոր նախագահի հետ

Թուրքական «Զաման» (Zaman) առցանց օրաթերթը հայտնում է, որ Անկարան լավատեսական հույսեր է կապում Ֆրանսիայի նորընտիր նախագահ, սոցիալիստների առաջնորդ Ֆրանսուա Օլանդի պաշտոնավարման հետ:

Նշվում է, որ Օլանդը Սարկոզիի նման չի փորձում խոչընդոտել Թուրքիայի եվրոանդամակցությանը: Բայց մի մտահոգություն, այնուամենայնիվ, Անկարան ունի: Վերջինիս անհանգստացնում է այն, որ Ֆրանսուա Օլանդն իր նախորդից ավելի նախանձախնդիր ջանասիրություն է ցուցաբերում Հայոց ցեղասպանության ժխտումը քրեականացնող օրինագծի ընդունման գործում:

Թուրքական «Ջիհան» (Cihan) լրատվական գործակալությունն այդ հարցով դիմել է Ֆրանսիայում Թուրքիայի արտակարգ և լիազոր դեսպան Թահսին Բուրջուօղլուին: Վերջինս շատ հստակ պատասխանել է. «Եթե Ցեղասպանության ժխտումը քրեականացնող օրինագծի ընդունման հարցում համառություն դրսևորվի, ֆրանս-թուրքական հարաբերություններն ուղղակի կարող են փակուղի մտնել: Թուրքական պետությունը, ազգը և Ֆրանսիայի թուրքական համայնքը կշարունակեն դեմ կանգնել դրան»:

http://www.panorama.am/am/politics/2012/05/10/turkey-france/