Ադրբեջանցիները «թուրքացրել» են Նոյ նահապետին

Ադրբեջանի «գիտնականները» 2006 թ. հայտարարել են, որ Նախիջեւանում, որը նրանք ոչինչ չնշանակող «Նախչըվան» են կոչում, «հայտնաբերել» են Նոյ նահապետի գերեզմանը: Նախիջեւանի առաջնորդ Վասիֆ Թալիբովն էլ շտապ կարգով Նոյի «գերեզմանի» վրա մզկիթի նմանվող դամբարան է կառուցել եւ 2008 թ. այն դարձրել թանգարան: 2009 թ. ապրիլի 28-ին Նախիջեւանում հրատարկվող «Շարգ գափըսը» (Արեւելքի դարպաս) թերթում Թալիբովը հայտարարել է, որ «Նախիջեւանը Նոյի հայրենիքն է»: Այս մասին, ինչպես հաղորդում է «Արմենպրես»–ը, հայտնում է gafgazinfo.az լրատվական կայքը:

Նախիջեւանից դուրս «Քոհնա Գալա» (Հնաբերդ) կոչված վայրում Նոյի «գերեզման»-ի վրա կառուցված մզկիթ-դամբարան-թանգարանում Թալիբովի նահապետը ներկայացված է որպես ադրբեջանցիների «նախահայր»: Ներսում գերեզման հիշեցնող ոչինչ չկա: «Թանգարանի» ուղեկցորդը «պարզաբանում» է, որ այն մնացել է դամբարանի «բետոնե սալահատակի տակ» եւ «այդ պատճառով էլ գերեզմանը տեսնել հնարավոր չէ»: Դամբարանի ներսը «զարդարված» է տարբեր պատկերներով եւ լուսանկարներով: Այդտեղ ներկայացված են Նոյի տապանի իբրեւ թե իջնելու վայրի պատկերները: Քարեր պատկերող մի լուսանկարի մասին ուղեկցորդը պատմում է, որ Նոյի տապանը Օրդուբադի շրջանում գտնվող Գյամիգայա (Տապանալեռ) լեռան վրա իջնելու ժամանակ լեռը կիսվել է, դե «ադրբեջանցիներն էլ պահպանել են լեռան վրայից պոկված մասերից մեկը»: «Լուսանկարում լեռան վրայից պոկված հենց այդ քարակտորն է պատկերված», -ասում է նա:

Ուղեկցորդի անգիր արած «բացատրություններից» ամենազավեշտալին այն է, որ ադրբեջանցիները համոզված են, որ Նոյ նահապետը «բնակվել է Նախիջեւանում եւ այդտեղ էլ մահացել»: «Նոյի տապանը Աղրըին (նկատի ունի Արարատ լեռը) դիպչելուց հետո դիպել է Նախիջեւանի Հաչադաղին (Երկճղի լեռ) եւ կանգ առել Օրդուբադում: Նոյ մարգարեն այնուհետեւ մշտապես ապրել է Նախիջեւանում եւ այստեղ էլ մահացել»,-«համոզված» ասում է նա եւ հավելում, թե դա «հաստատում» են նաեւ «աշխարհի գիտնականները»: «2009 թ. արաբ, լատին, պարսիկ, հույն, թուրք եւ եվրոպացի գիտնականները Նախիջեւանում գիտաժողով են անցկացրել: Նրանք այստեղ ուսումնասիրություններ են կատարել եւ որոշել, որ իսկապես Նոյի գերեզմանը Նախիջեւանում է», -ասում է նա:

Հետաքրքիր է, որ Ադրբեջանում, այնուամենայնիվ, մի պատմաբան է գտնվել, որը հայտարարել է, որ հնարավոր չէ խոսել Նոյի հստակ բնակավայրի մասին: «Նոյ մարգարեի բնակության վայրի հետ կապված ոչ մի պատմական տեղեկություն չկա: Ոչ ոք չի կարող ասել, թե նա որտեղ է ապրել: Նախիջեւանում կառուցված գերեզմանն առնվազը ծիծաղ է առաջացնում: Դա պնդողներից ոչ մեկը ճանաչված չէ որպես լուրջ գիտնական: Անգամ ԴՆԹ-ով պարզել հնարավոր չէ, թե 7 հազար տարի առաջ մահացած մարդը Նոյ մարգարեն է, թե մեկ ուրիշը», -ասում է ադրբեջանցի պատմաբան Ալթայ Գյոյուշովը:

http://armenpress.am/arm/news/690978/adrbejancinery-turqacrel-en-noy-nahapetin-tesanyut.html