Թուրք հայտնի քաղաքական վերլուծաբան Մեհմեդ Ալի Բիրանդը Ֆրանսիայում նախագահական ընտրությունների հետ կապված գտնում է, որ Անկարայի համար Ֆրանսիայում տեղի ունեցած փոփոխության միակ դրական կողմը Սարկոզիի նման Թուրքիային բացահայտ դեմ չլինող Օլանդի նախագահ ընտրվելն է: Սակայն, նա անմիջապես զգուշացնում է Թուրքիային` այնքան էլ չուրախանալ այդ իրադարձությամբ, որովհետեւ Հայոց ցեղասպանության հարցում Ֆրանսիայի նոր նախագահ Ֆրանսուա Օլանդը Նիկոլյա Սարկոզիից «ավելի վճռական է»:
Ինչպես հաղորդում է «Արմենպրես»–ը, Բիրանդը թուրքական «Միլիեթ»-ում գրում է. «Պետք չէ սխալվել, ի տարբերություն Սարկոզիի, Օլանդն սկզբունքորեն դեմ չէ Թուրքիայի` Եվրամիությանն անդամակցությանը եւ չի հետաքննում Թուրքիայի «եվրոպականացման» հարցը: Դրան հակառակ` նա Թուրքիայի ԵՄ անդամակցության համար պայման է դնում Անկարայի կողմից Հայոց ցեղասպանության ճանաչման հարցը եւ, ինչպես երեւում է, նա իր այդ մոտեցումից հեշտությամբ հրաժարվողներից չէ»:
Բիրանդը գտնում է, որ Թուրքիայի` ԵՄ հետ հարաբերությունների տեսակետից Փարիզում տեղի ունեցած այդ փոփոխությունը նշանակալից տարբերություն չի բերելու Անկարայի համար: «Օլանդն արդեն հայտարարել է, որ իր նախագահության 5 տարիներին խոսք անգամ չի կարող լինել Թուրքիայի` ԵՄ անդամակցության մասին», -ընդգծել է նա:
Ֆրանսիայի նախագահ ընտրվելուց հետո Ֆրանսուա Օլանդը մեկ անգամ եւս հայտարարել է, որ ամեն ջանք գործադրելու է Հայոց ցեղասպանության ժխտումը քրեականացնող օրինագիծը կյանքի կոչելու համար: «Ֆրանսիան չպետք է տարբերություն դնի իր կողմից ընդունված ցեղասպանությունների միջեւ», -հայտարարել է Ֆրանսիայի նորընտիր նախագահը:
Leave a Reply