«Վաքըֆների հարցում մեր չափորոշիչը իրավունքը և արդարությունը կլինեն». Բյուլենթ Արընչ

Թուրքիայի Ազգային մեծ ժողովում հանդիսավոր կերպով կատարվեց Վաքըֆների գլխավոր տնօրինության կողմից կազմակերպված «Վաքըֆների շաբաթվա» բացումը:

«Անադոլու» լրատվական գործակալության փոխանցմամբ` բացման արարողության ժամանակ ելույթ է ունեցել Թուրքիայի փոխվարչապետ Բյուլենթ Արընչը, որը շեշտելով, թե Թուրքիայում, երկար տարիներ է, ինչ տարբեր պատճառներով փոքրամասնությունների վաքըֆների նկատմամբ ցուցաբերվել է ներկայում անընդունելի վերաբերմունք, նաև նշել է. «Վաքըֆների օրենքին 2011 թ. մի հոդված հավելելով` նշանակալի քայլ կատարեցինք համայնքային վաքըֆների գույքի վերադարձման հարցում: Օրենքի ընդունման ամսաթվից մինչ օրս 88 անշարժ գույքից 18-ն արդեն վերադարձվել է տերերին: Այսուհետ մեր կատարելիք քայլերում ևս անսահման արդարություն կլինի»:
Արընչը նաև ընդգծել է, թե երբ ներկայիս փուլը համեմատում ենք 2002 թ. հետ, այնպիսի պատկեր ենք տեսնում, որով «կարելի է ուղղակի հպարտանալ»:

Արընչը ներկաներին նաև բողոքել է, թե վաքըֆների հարցով պատասխանատու նախարար լինելը ծանր պարտավորություններ է ենթադրում:

Akunq.net