Թուրքիայում ձերբակալված լրագրողների պաշտոնական թիվը 92 է

Թուրքիայի` Եվրամիության հարցերով պետնախարար Էգեմեն Բաղըշը տեղեկացրել է, որ Թուրքիայում ձերբակալված լրագրողների թիվն 92 է:

Թուրքիայի խորհրդարանի Ժողովրդահանրապետական կուսակցության պատգամավոր Սալիհ Ֆըրաթը վարչապետ Ռեջեփ Թայիփ Էրդողանին գրավոր հարց է ուղղել ձերբակալված լրագրողների մասին, ինչին պատասխանել է Էգեմեն Բաղըշը:

«Արդարադատության նախարարության տվյալներով` ձերբակաված լրագրողներն իրականում սահմանադրական կարգը բռնությամբ փոխելու փորձ կատարած, զինված ահաբեկչական խմբավորման անդամ եղած, ահաբեկչության քարոզ կատարած, Թուրքիայի հանրապետության կառավարության դեմ զինված ապստամբության փորձ կատարած, մամուլի միջոցով ահաբեկչության քարոզչություն կատարած անձինք են»,- ասել է Բաղըշը:

Բացի այդ` նա պնդել է, որ ձերբակալված լրագրողների մեջ գողություն կատարած, մարդկանց առևանգած կամ սպանած, թմրանյութի առևտրով զբաղված, խաբեությամբ գումար վաստակած մարդիկ կան:

Ավելի վաղ Բաղըշը նմանատիպ մեկ այլ հայտարարություն էր արել, ինչը զայրացրել էր Թուրքիայի մի շարք հասարակական կազմակերպություններին, որոնք հրապարակել են թուրքական բանտերում պահվող լրագրողների ցուցակը: Պարզվել էր, որ ձերբակալված 104 լրագրողներից և լրատվական դաշտում աշխատող 35 անձանցից որևէ մեկը «բռնաբարության» կամ «թալանի» մեղադրանքով չի դատապարտվել:

Եվրամիությունը նույնպես բազմիցս մտահոգություն է հայտնել Թուրքիայում ձերբակալված լրագրողների թվի աճի կապակցությամբ:

«Մենք ողջունում ենք մի քանի լրագրողների ազատ արձակումը, բայց հիշեցնում, որ նրանց դատական հետապնդումը դեռևս շարունակվում է: Մենք ցավում ենք, որ դատարանները սովորաբար մինչ դատավարությունն ամբաստանյալներին ազատ չեն արձակում»,- ասված էր ԵՄ հրապարակած վերջին փաստաթղթում:

http://tert.am/am/news/2012/05/08/bagsh/