Եղեռնի 97-րդ տարելիցի առիթով միջոցառում Աթենքում

Հայոց Ցեղասպանության 97-րդ տարելիցի առիթով, երկուշաբթի ապրիլի 30-ի երեկոյան, Աթենքի քաղաքապետարանի «Մելինա Մերքուրի» անվան թատերասրահը հյուրընկալեց հարյուրավոր հայորդիների՝ մեծ մասամբ երիտասարդություն, ինչպես նաև հույն և օտար հրավիրյալներ:

«Հայաստան» հասարակական մշակութային կենտրոնի կողմից՝ «Եղեռն, վերածնունդ, պայքար» նշանաբանով, կազմակերպված այս երեկոն բաղկացած էր երկու մասից, պատգամ՝ խոսքով և արվեստով:
Միջոցառումը սկսվեց մեկ վայրկյան հոտնկայս լռությամբ, ապա նախագահող Հայկ Գասարճյանը հանդես եկավ բացման խոսքով եւ անդրադարձավ Հայկական հարցի հետապնդման գործընթացի տարբեր հանգրվաններին ու մեր օրերում դեպի Մերձավոր արևելք տարածվելու թուրքական ծավալապաշտության ձգտումներին, որով ուժերի նոր հարաբերություն է փորձում պարտադրել տարածաշրջանին:
Այնուհետև, Հ. Գասարճյանը բեմ հրավիրեց Հունաստանի հայոց թեմի առաջնորդական տեղապահ Տ. Խորեն աբեղա Առաքելյանին, ով իր օրհնանքն ուղեղց Եղեռնի 97–րդ տարելիցի կապակցությամբ:

Ապա բեմ հրավիրվեցին Արմինե Ալվաչյանն ու Իլոնա Մարկոսյանը, հայերեն և հունարեն լեզուներով, «Հայաստան» հասարակական մշակութային կենտրոնի պատգամը ուղղելու ներկաներին:
«Հայաստան» ՀՄ կենտրոնի խոսքում մասնավորապես ասվում է. «Շուրջ չորս տասնամյա հետևողական պայքարի շնորհիվ, կես դար անտեսված Հայկական հարցը վերածվեց քաղաքական զգայուն մի հարցի: Աշխարհի ավելի քան երկու տասնյակ պետությունների և բազմաթիվ միջազգային հաստատությունների կողմից Ցեղասպանության իրողության դատապարտումը, Թուրքիայի պետական քաղաքականության մեջ տեղի ունեցող ցնցումային փոփոխությունը՝ հայությունը անտեսելու և արհամարհելու մարտավարությունից պետական բոլոր ներուժով հակապայքարի անցնելն ու ցեղասպանության ժխտումը, եւ Եղեռնի նկատմամբ թուրք մտավորականության և հանրային կարծիքի կողմից թեկուզ կրավորական, բայց հետզհետե աճող գիտակցությունը՝ հայկական պայքարի նվաճումներից կարելի է համարել»:
Կենտրոնի պատգամը եզրակցնում է. «Ոմանք այսօր խոսում են, Ցեղասպանության ճանաչման մասին, մինչդեռ Ցեղասպանության իրողությունը ճանաչման կարիք չունի: Հայ ժողովուրդը ոչ թե Ցեղասպանության իրողության ճանաչումն է պահանջում, այլ Ցեղասպանության դատապարտումը, որպես մարդկության դեմ իրագործված ծանրագույն ոճիր»:

Այնուհետ բեմ հրավիրվեց ՀՀ Արտակարգ և լիազոր դեսպան Գագիկ Ղալաչյանը:
Դեսպան Ղալաչյանը իր պատգամում գոհունակություն հայտնեց, որ միջազգային հանրությունը այլևս գիտակցում է, որ Հայկական Ցեղասպանության ուրացումը ավելի պակաս հանցագործություն չէ, քան ցեղասպանության ոճրի ծրագրումն ու իրագործումը:
Նա իր շնորհակալությունն հայտնեց այն բոլոր միջազգային կազմակերպություններին ու երկրներին, որոնք դատապարտել են հայության դեմ իրագործված ցեղասպանությունը, ընդորում Հունաստանին ու Կիպրոսին, երկրներ, որոնցում Ղալաչյանը ներկայանում է, որպես ՀՀ Արտակագ և Լիազոր դեսպան:
Պրն. դեսպանը իր պատգամի վերջում շեշտեց, որ պատմության դատաստանը կայանալու է անպայման և հայությունը պայքարելու է մինչև արդարության վերականգնումը:

Ապա բեմ հրավիրվեց, օրվա բանախոս, Հունաստանի խորհրդարանական «Արմատական ձախ կոալիցիա»-ի («Սինասփիզմոս») երկար տարիների նախագահ, իրավաբան Նիկոս Կոստանդոպուլոսը:
Բանախոսն իր խոսքի սկզբում նշեց. «Մեծ պատիվ և ավելի մեծ պատասխանատվություն է ինձ համար այս բանախոսության հրավիրվելը», ապա ավելացրեց. «Տարելիցները պարզապես զգացմունքի արտահայություն չեն, ոչ էլ միմիայն հարգանքի տուրքի մատուցում, այլ նոր սերունդներին պատգամի փոխանցման առիթ, իր պատմության նկատմամբ պատասխանատվություն ստանձնելու համար»:
«Հայության դեմ գործադրված ոճիրը միայն հասցեագրված չէ հայերին, այլ մարդկությանը և Ցեղասպանության դատապարտման համար պայքարը, ոչ թե պարզապես ազգային հարցի, այլ համամարդկային հարցի հետապնդում է, դա միջազգային իրավունքի հարց է, դա քաղաքակրթությունների պաշտպանության հարց է», ասաց Կոստանդոպուլոսը և հավելեց. «Հայությունը փաստեց, որ իր պատմությունը ստեղծագործություն է, որ ստեղծագործությունը դիմադրական պայքար է, ամենևին խաղաղ պայքար: Եվ ոչ մի պետություն, ինչքան էլ որ լինի հզոր, չի կարող պատնեշներ կառուցել իրականության առջև, չի կարող պատմություն հորինել»:
Նա ասաց. «Զգացված եմ հանուն ճշմարտության շարունակվող Հայկական պայքարից» և շեշտեց, որ «այս ճանապարհը միակողմանի ճանապարհ է բոլոր ժողովուրդների և մարդկության համար»:
Այնուհետ սկսվեց միջոցառման գեղարվեստական բաժինը, բաղկացած՝ «Հայաստան» մշակութային կենտրոնի «Հայասա» ասմունքի և «Սայաթ Նովա» ժողգործիքների եւ Ստրադային նվագախմբի ու նաև երիտասարդ դաշնակահարների կատարումներից, որ մեծ գոհունակությամբ ընդառաջվեց ներկաների կողմից:

Աթենք, “Հայաստան” լրատու ցանց:

http://haynews.am/hy/1336234163