Թուրքիայի հիմնադրամների վարչությունը փոխհատուցում կվճարի հայկական համայնքին

Թուրքիայի հիմնադրամների վարչությունը որոշել է փոխհատուցում վճարել Ստամբուլի Գեդիքփաշա թաղամասում գտնվող հայկական բողոքական եկեղեցուն եւ դպրոցին:

Ինչպես հաղորդում է «Արմենպրես»-ը` վկայակոչելով թուրքական «Հաբեր 7» լրատվական կայքը, որոշումը պայմանավորված է այն բանով, որ հիմնադրամը չի կարող վերադարձնել հայկական եկեղեցուն եւ դպրոցին պատկանող անշարժ գույքը, քանի որ այն վաճառված է երրորդ կողմին: Անշարժ գույքի արժեքը եւ փոխհատուցման չափը կորոշվի Թուրքիայի ֆինանսների նախարարության կողմից:

Գեդիքփաշայի հայկական եկեղեցու եւ դպրոցի հիմնադրամն ավելի վաղ դիմել էր Թուրքիայի հիմնադրամների վարչություն եւ պահանջել վերադարձնել իրեն պատկանող անշարժ գույքը:

Թուրքիայի հիմնադրամների վարչությունը մերժել է հայկական հիմնադրամի մեկ այլ` Մալաթիայի հայկական մանկատունն իրեն վերադարձնելու դիմումը, որտեղ, ի դեպ, մեծացել է Հրանտ Դինքը:

http://armenpress.am/arm/news/690159/turqiayi-himnadramneri-varchutyuny–pokhhatucum-kvtchari.html