Թուրքիայի մայրաքաղաք Անկարայում մայիսմեկյան ցույցերի ընթացքում բախումներ են տեղի ունեցել ոստիկանության և ցուցարարների միջև: Ոստիկանությունը ցուցարարների դեմ արցունքաբեր ռումբեր է կիրառել:
Անկարայում 500 հոգանոց խումբը փորձել է հաղթահարել ոստիկանների արգելապատնեշն ու քայլերթ կազմակերպել, սակայն ոստիկանները դիմել են արցունքաբեր գազի և մահակների օգնությանը:
Անկարայի քաղաքապետարանն արգելել է Սիհհիյե հրապարակում հանրահավաքի անցկացումը: Հրապարակում հսկողություն են իրականացնում մոտ 4000 ոստիկաններ:
«Կեցցե մայիսի մեկը» վանկարկող ցուցարարները դհոլ զուռնայի երաժշտության ուղեկցությամբ քայլերթ են իրականացրել և ցանկանում են, չնայած քաղաքապետարանի արգելքին, հանրահավաք կազմակերպել:
Զանգվածային հանրահավաքներ են տեղի ունենում նաև Բուրսա, Թունջելի քաղաքներում: Ամենամեծ հանրահավաքները, սակայն, տեղի են ունենում Ստամբուլի Թաքսիմ հրապարակում:
Թուրք «հեղափոխական իսլամիստները» ավելի վաղ կոչ էին արել մայիսի 1-ը հեղափոխությամբ նշել:
«Անցյալի շատ իրադարձություններին մուսուլմանական մեր համայնքն աչք է փակել: Սակայն եկել է լռությունը խախտելու ժամանակը: Ղուրանի հատվածները մեջտեղ բերելով ցանկանում ենք առերեսվել մեր պատմության հետ:Մենք ցանկանում էինք փոքր խմբով քայլերթ կազմակերպել, սակայն շատերը միացան մեզ»,- ասված էր խմբի տարածած հաղորդագրության մեջ:
Leave a Reply