Յասին Հայալը պահանջում է դատական գործ բացել իրեն Դինքի սպանությանը դրդած զինվորականների դեմ

Հրանտ Դինքի սպանության գործով ցմահ ազատազրկման դատապարտված Յասին Հայալը թուրքական Taraf-ի հետ զրույցում պահանջել է դատական գործ բացել Տրապիզոնի ժանդարմերիայի սպաների դեմ։

Յասին Հայալը պնդել է, թե իրեն հաճախակի հրավիրել են Տրապիզոնի նահանգային ժանդարմերիա եւ խորհուրդ տվել կապ պահպանել Էրհան Թունջելի (Ժանդարմերիայի հետախուզության գործակալ, ով արդարացվեց Դինքի սպանության գործով դատավարությանը) հետ։

«Ես մինչ Դինքի սպանությունը ժանդարմերիա շատ եմ այցելել, սակայն իմ այցերը չի գրանցվել մատյանում։ Սպանության հետ կապված հրամանները ես ստացել եմ Էրհան Թունջելի միջոցով։ Եթե Տրապիզոնի ժանդարմերիայի հրամանատարների դեմ դատական գործ բացվի, ես կգնամ վկայություն կտամ։ Նրանք պետք է դատվեն Հրանտ Դինքի սպանության գործով»,-ասել է Յասին Հայալը։

Նշենք, որ Տրապիզոնի ժանդարմերիայի 6 սպաների նկատմամբ Տրապիզոնի քաղաքացիական գործերով դատարանը կայացրել է ծիծաղելի որոշում՝ պարտականությունների թերացման համար եւ դատապարտել 4-ից 6 ամիս ազատազրկման։

http://news.am/arm/news/95712.html