Քոնկրեսի 60 անդամներ Քլինթընէն կը պահանջեն սրբագրել Ցեղասպանութեան նկատմամբ իր խօսքը

Քլինթըն յայտարարած էր, թէ «պատմական բանավէճ» մը տեղի պէտք է ունենայ Հայկական Ցեղասպանութեան հարցով: Այդ յայտարարութեան ակնարկելով՝ քոնկրեսականները կը գրեն, թէ Քլինթըն պէտք է ետ քաշէ իր այդ խօսքը, որովհետեւ անոր կեցուածքը սկսած է գրեթէ նոյնանալու Թուրքիոյ ուրացման քաղաքականութեան հետ: Անոնք կ՛աւելցնեն, թէ Քլինթըն պէտք է յստակօրէն ընդունի Հայկական Ցեղասպանութեան պատմական իրողութիւնը՝ յիշեցնելով, թէ «ցեղասպանութիւն» բառը ստեղծուած էր՝ օրինակ ունենալով Հայկական Ցեղասպանութիւնը:

Ամերիկայի Հայ Դատի յանձնախումբի վարիչ գործավար Արամ Համբարեան դրուատեց քոնկրեսականներուն սոյն աշխատանքը:

Քոնկրեսականները նաեւ ծրագրած են յառաջիկայ օրերուն այս կապակցութեամբ հարցումներ ուղղել Քլինթընի, որ Քոնկրեսին զանազան յանձնախումբերուն առջեւ զեկուցումներ պիտի ներկայացնէ:

Նամակը ստորագրած քոնկրեսականներուն ամբողջական ցանկը կարելի է կարդալ մեր համացանցային կայքին վրայ՝ www.asbarez.com հասցէով:

http://asbarez.com/arm/123914/