Հայոց ցեղասպանությունը ճանաչած թուրք իրավապաշտպանը դիմել է ՄԻԵԴ

Հայոց ցեղասպանությունը ճանաչած թուրք հայտնի իրավապաշտպան, Ստամբուլի «Բելգե» հրատարակչության սեփականատեր Ռագըփ Զարաքօլուն դիմել է Մարդու իրավունքների եվրոպական դատարան (ՄԻԵԴ):

Ինչպես հաղորդում է «Արմենպրես»–ը` վկայակոչելով քրդական Fırat լրատվական գործակալությունը, Քրդստանի աշխատավորական կուսակցության քաղաքային թեւ համարվող Քրդստանի հասարակությունների միության (KCK) գործի շրջանակում ձերբակալված եւ արդեն 120 օր կալանքի տակ գտնվող Զարաքօլուն հայցում Թուրքիայի իրավապահ եւ դատական ատյաններին մեղադրել է օրենքից դուրս գործողություններ իրագործելու մեջ: Զարաքօլուն ՄԻԵԴ ուղարկած հայցում նշել է, որ թուրքական դատարաններն իր փաստաբաններին չեն տրամադրում իրեն ձերբակալելու եւ կալանքի տակ վերցնելու վերաբերյալ մեղադրանքի հիմնավորումները` պատճառաբանելով դա գաղտնիությունը չխախտելու սկզբունքով:

Ռագըփ Զարաքօլուն իր «Բելգե» հրատարակչությունում բազմաթիվ գրքեր է տպագրել Հայոց ցեղասպանության մասին:

Նշենք, որ Շվեդիայի խորհրդարանի մի խումբ պատգամավորներ Նոբելյան մրցանակի հանձնաժողովին առաջարկել են 2012 թ. Խաղաղության Նոբելյան մրցանակը հանձնել Ռագըփ Զարաքոլուին:

http://armenpress.am/arm/news/681861/hayoc-cexaspanutyuny-tchanachats-turq-iravapashtpany-dimel.html