Թուրքիայի արտգործնախարարը և փոխվարչապետը մեկնաբանել են Ֆրանսիայի ՍԽ-ի որոշումը

Թուրքիայի արտգործնախարար Ահմեթ Դավութօղլուն ողջունել է Ֆրանսիայի Սահմանադրական խորհրդի` ցեղասպանությունների ժխտումը քրեականցնող օրինագիծը հակասահմանադրական ճանաչելու մասին որոշումը:

Ֆրանսիայի Սահմանադրական խորհուրդը երեկ հակասահմանադրական ճանաչեց ցեղասպանությունների ժխտումը քրեականացնող օրինագիծը` պատճառաբանելով, որ այն հակասում է խոսքի ազատության իրավունքին:

«Ֆրանսիայի Սահմանադրական խորհրդի ընդունած որոշումը համապատասխանում է Ֆրանսիայի սահմանադրությամբ ամրագրված մարդու իրավունքների հասկացությանը և եվրոպական արժեքներին, որոնք մենք բոլորս պաշտպանում ենք»,-հայտարարել է Դավութօղլուն:

Ֆրանսիայի Սենատը հունվարի 23–ին ձայների 127 կողմ և 86 դեմ հարաբերակցությամբ ընդունել էր ցեղասպանությունների ժխտումը քրեականացնելու մասին օրինագիծը (օրինագիծը վերաբերում է Ֆրանսիայի կողմից ճանաչված ցեղասպանությունների ժխտման քրեականացմանը։ Ֆրանսիան Հայոց ցեղասպանությունից բացի ճանաչել է նաև հրեաների ցեղասպանությունը՝ Հոլոքոստը, որի ժխտումն արդեն իսկ քրեականացված է Ֆրանսիայում): Նոր օրինագծի համաձայն՝ Ֆրանսիայում Հայոց ցեղասպանությունը ժխտողներին 1 տարվա ազատազրկում և 45.000 եվրո տուգանք էր սպառնում։

Օրինագծին դեմ հանդես եկած խորհրդարանականները, դրա սահմանադրականությունը վիճարկելու նպատակով, հունվարի 31-ին Ֆրանսիայի Սահմանադրական խորհուրդ դիմում էին ներկայացրել:

Ինչպես հաղորդում է թուրքական Hurriyetdailynews.com կայքը, Դավութօղլուն նաև շնորհակալություն է հայտնել բոլոր նրանց, ովքեր «նպաստեցին օրինագծի` Սահմանադրական խորհուրդ ներկայացմանը»:

Ֆրանսիայի Սահմանադրական խորհրդի ընդունած որոշմանն անդրադրձել է նաև Թուրքիայի փոխվարչապետ Բյուլենթ Արընչը` նշելով, թե Խորհուրդն իր այդ որոշմամբ «իրավունքի դաս տվեց ֆրասիացի քաղաքական գործիչներին»:

Հավելենք, որ երեկ Ֆրանսիայի նախագահ Նիկոլա Սարկոզին կառավարությանը հանձնարարել է ցեղասպանությունների ժխտումը քրեականացնող նոր օրինագծի տեքստ պատրաստել:

http://tert.am/am/news/2012/02/29/davutoghlu/