Թուրքիայի Ադըյաման և Մալաթիա նահանգներում Նեմրութ լեռան տեսարժան վայրի` Երվանդունիների դամբարանի ապագայի շուրջ վիճաբանությունը աճում է: Այս մասին գրում է «Հյուրիեթը»:
Բանն այն է, որ Մալաթիան ցանկանում է պատմական լեռն իր սեփական զբոսաշրջային ծրագրի շրջանակներում օգտագործել, բայց Մալաթիան և Ադըյամանը ներկայում «կիսում են» տեղանքը` որպես ՅՈՒՆԵՍԿՕ-ի Համաշխարհային ժառանգության ծրագրի մաս: Ադըյամանի համանուն վարչական կենտրոնի քաղաքապետը վիճելի հարցը դատարան է հասցրել:
Ըստ քաղաքապետի` շրջանի Մշակութային վայրերի պահպանության ասոցիացիան նոր սահման է որոշել Նեմրութ լեռան համար, ինչը, ըստ ասոցիացիայի, կարող է ՅՈՒՆԵՍԿՕ-ի ժառանգության ծրագրից Նեմրութը հանելու պատճառ դառնալ:
Լեռան շուրջ վեճը ծագել էր տեղանքի ենթակառուցվածքներից. Մալաթիայի քաղաքապետարանը ցանկացել էր հեշտացնել զբոսաշրջիկների մուտքը լեռ` նոր ճանապարհներ և հյուրանոցներ կառուցելով: Սակայն Ադըյամանի քաղաքային իշխանություններն էլ լեռան նկատմամաբ իրենց իրավունքների մասին են հայտնում` Նեմրութը սեփական զբոսաշրջային ծրագրերին համապատասխան օգտագործելու համար:
2134 մ բարձրությամբ Նեմրութը հայտնի է իր բացառիկ գագաթով և հայկական թագավորական դամբարանի ավերակներով: Նեմրութի հնությունների մասին գրելով` «Հյուրիեթը» հայերի առնչությամբ նշում է միայն այն, որ այնտեղ կան հունական, հայկական և իրանական աստվածների արձաններ, որոնց գլուխները հիմա առանձնացված են նստած դիրքով նրանց մարմիններից: Խոսվում է նաև Երվանդունիների տոհմից Անտիոքոս Ա Կոմմագենացու մասին, ով էլ կառուցել է դամբարանը:
Leave a Reply