Ֆրանսիայի Սահմանադրական խորհուրդն այսօր երեկոյան վճիռ կկայացնի ցեղասպանությունների մասին օրենքի վերաբերյալ

Ֆրանսիայի Սահմանադրական խորհուրդն այսօր` փետրվարի 28-ին, ժամը 17:00-ին (Երեւանի ժամանակով 20:00-ին) պետք է իր եզրակացությունը ներկայացնի ցեղասպանությունների մասին օրենքի սահմանադրությանը համապատասխանելու հարցի վերաբերյալ: Խոսքը ցեղասպանությունների, այդ թվում Հայոց ցեղասպանության ժխտումը քրեականացնող օրենքի մասին է, հաղորդում է «Nouvelles d`Arménie»-ն:

Այս օրենքը, որն առավել հայտնի է որպես Բուայեի օրենք, ընդունվել է պատգամավորների պալատի կողմից եւ վավերացվել Սենատի կողմից հունվարի 23-ին:

Թուրքամետ ու ադրբեջանամետ լոբբիստների, ինչպես նաեւ պաշտոնական Անկարայի ճնշման ներքո, որոշակի թվով պատգամավորներ (այդ թվում 52 պատգամավորներ ԱԺ-ում իշխող «Հանուն ժողովրդական շարժման միությունից» 22 սոցիալիստ-սենատորներ եւ 15 սենատորներ «Եվրոպական եւ սոցիալական ժողով» խմբակցությունից) հունվարի 31-ին դիմել են Սահմանադրական խորհուրդ, որն իրավունք ունի չեղյալ համարել այդ օրենքը եւ դրանով բավարարել Թուրքիայի պահանջը:

‘Le Canard Enchain’ թերթը գրել է, որ Սահմանադրական խորհրդի անդամներից ոմանք արդեն դեմ են հանդես եկել այսպես կոչված «հիշատակների» վերաբերող օրենքներին: Նրանցից մեկը` Յուբեր Էնելն է, ով թուրքամետ լոբբիստական խմբի` Բոսֆորի ինստիտուտի անդամ է:

Ինչ վերաբերում է Սահմանադրական խորհրդի նախագահ Ժան-Լուի Դեբրեին, նա աչքի է ընկել Հայոց ցեղասպանության ժխտումը քրեականացմանը հակազդելու ելույթներով եւ անգամ փորձել է խոչընդոտել 2006-ի մայիսի 18-ին Ֆրանսիայի Ազգային ժողովում այդ թեմայով քննարկմանը (նա այդ ժամանակ վարում էր նստաշրջանի):

Հաշվի առնելով թուրքական լոբբիի, ինչպես նաեւ Ֆրանսիայի ԱԳՆ-ի եւ ռազմաարդյունաբերական համալիրի ինտենսիվ ճնշումը, բաց է մնում հարցը, թե արդյոք այս հարցում կգերակայե՞ն իրավական փաստարկներն այլ հիմքով դիրքորոշումներին: Այս հարցի պատասխանն ստանալու համար շատ քիչ ժամանակ է մնացել:

http://news.am/arm/news/95201.html