Կոստանդնուպոլսի ուղղափառ պատիարքը օրերս Թուրքիայի խորհրդարանում ելույթ ունենալով` հավասար իրավունքներ է պահանջել կրոնական փոքրամասնությունների համար: Բարդուղիմեոս I-ին խնդրել են կարծիք հայտնել նոր Սահմանադրության նախագծի վերաբերյալ, որն արդեն այս տարի պետք է ուժի մեջ մտնի:
Թուրքական լրատվամիջոցներն ուշադրություն են դարձրել քրիստոնեական առաջնորդի աննախադեպ այցին այն երկրի խորհրդարան, որի քաղաքացիների մեծամասնությունն իսլամի հետեւորդ է: Այդ նույն օրը խորհրդարանում ելույթ է ունեցել Սիրիո-Հակոբինյան եկեղեցու առաջնորդը: Նախատեսվում են հայկական եւ հրեական համայնքների հետ խորհրդակցություններ:
Բարդուղիմեոս պատրիարքը հիշեցրել է, որ մինչեւ այժմ Թուրքիայում քրիստոնյաները ենթարկվում են խտրականության եւ դիտարկվում որպես երկրորդ կարգի քաղաքացիներ: Ուղղափառ առաջնորդն այդ իրադրության փոփոխության հույս է հայտնել:
«Միակ բանը, որ մենք ուզում ենք, իրավահավասարությունն է»,- ասել է նա: Միաժամանակ պատրիարքը մի շարք խնդիրներ է մատնանշել, որոնք մինչ այժմ լուծում չեն ստացել: Թուրքիայում 1971 թվականին փակված միակ ուղղափառ հոգեւոր սեմինարիան, չնայած ԵՄ-ի բոլոր խնդրանքներին, այդպես էլ չի վերաբացվել, գրում է «Սիբիրսկայա կատոլիչեսկայա գազետան»:
Leave a Reply