Թուրքիայի փոխվարչապետը քննադատել է Դինքի գործով դատարանի ընդունած որոշումը

Թուրքիայի փոխվարչապետ Բեքիր Բոզդաղը, քննադատելով Հրանտ Դինքի գործով դատարանի ընդունած որոշումը, ասել է. «Որոշումը մթությունը լուսավորվելու համար մի մոմ անգամ չկարողացավ վառել»: Այս մասին հաղորդում է «Արմենպրես»–ը` վկայակոչելով թուրքական «Հուրիեթ» թերթը:

Թուրքիայի փոխվարչապետը, խոսելով թղթակիցների հետ, ասել է, որ 2007 թ. հունվարի 19-ին Դինքի դեմ իրականացված հանցագործությանը նախորդած դեպքերը վկայում են այն մասին, որ այդ բոլոր հանցագործությունները մեկ ընդհանուր շղթայի մեջ են մտնում: Բոզդաղը նշել է, որ դատավարության ժամանակ գործի առնչությամբ անհրաժեշտ չափով ուսումնասիրություններ չեն կատարվել, իսկ դատարանի ընդունած որոշումը ոչ միայն չի լուսավորել կատարված հանցագործությունը, այլև «մթության վրա մեկ այլ մթության վարագույր է փռել»:

«Դինքի սպանությունը, կարծում եմ, ուղղված էր Արդարություն և զարգացում կուսակցության դեմ: Դրա պարզաբանումն ամենից շատ մենք ենք ուզում»,- ասել է Թուրքիանի փոխվարչապետը:

http://armenpress.am/arm/news/681465/turqiayi-pokhvarchapety-qnnadatel-e-dinqi-gortsov-datarani.html