Հայոց Ցեղասպանությունը ժխտելու՝ թուրքական կառավարւթյան ջանքերին զուգընթաց տեղի թուրք հասարակության մի մասի մոտ ցանկություն է առաջացել իմանալ իրականությունը Ցեղասպանության խնդրի մասին, վերջերս Ստամբուլից վերադառնալով` այս եզրակացությանն է եկել Էջմիածնի միաբաններից Արսեն արքեպիսկոպոս Բերբերյանը:
Tert.am-ի հետ զրույցում արքեպիսկոպոսը նշեց, որ Թուրքիայի դիվանագիտությունն ընդդեմ Հայոց ցեղասպանության ճանաչման աշխատում է «սարսափելի ակտիվ», դրան զուգահեռ Հայաստանի համապատասախան կառույցների հովանավորությունները տեղի հայությանը օգնելու հարցում թերի է։
«Հայոց Ցեղասպանության մասին երկխոսությունը հայերի և թուրքերի միջև, լինի դա դրական, թե բացասական իմաստով, ակտիվացել է հատկապես Հրանտ Դինքի վերաբերյալ: Այնպես որ այս աշխատանքները պետք է կազմակերպված լինեն պետական մակարդակով և ոչ թե սիրողական մակարդակի, որը ես այնտեղ նկատեցի»,- ասաց հոգևորականը:
Հոգևորոկանը համոզված է, որ Ստամբուլի հայ համայնքը շատ մեծ դեր կարող է ունենալ` նյութեր մատակարարելով թե հայ, և թե թուրք հասարակությանը: «Ընդհանուր հաջողության հասնելու համար միգուցե հայերին էլ է պետք նման նյութեր տրամադրել, որպեսզի ինքնապաշտպանության համար կարողանան գրագետ և ճիշտ ձևով պատասխաններ տալ»- բացատրեց նա:
«Տեղի թերթերում այնպիսի հայտարարություններ այսօր կարելի է հանդիպել,ինչպես օրինակ` մեկը հայտարեց, որ ես հայ եմ, ի՞նչ է, դրա համար ինձ կդատապարտե՞ն, մյուն էլ գրեց, թե դուք այդքան քննադատում եք Ֆրանսիային և նախագահ Սարկոզիին, նրա լուսանկարները ծաղրում, դուք Թուրքիայում կարո՞ղ եք նույն բանը հայերին թույլ տալ, որ նրանք Էրդողանին կամ Գյուլին այդպես ծաղրեն: Ինչի՞մասին ենք խոսում»,– իր տպավորություններով է կիսվում Արսեն արքեպիսկոպոս Բերբերյանը:
Առանձին հարցերում, ըստ նրա, հայերի նկատմամբ ճնշումներ չկան. «Ընդհակառակը, այնքան քաղաքավարություն կա, որ զարմանում ես այդ հակասություններից: Օրինակ` քաղաքապետարանն ամեն շաբաթ մի խումբ մարդիկ է ուղարկում եկեղեցի, որոնք մաքրում են շրջակայքը, կամ ուխտագնացության օրերին մեքենա են տրամադրում, որ հայերն իրենց ժողովրդին հավաքեն գնան եկեղեցի, իրենց աղոթքն անեն»,- ասաց նա:
Արսեն արքեպիսկոպոս Բերբերյանը կարծում է, որ միայն ժողովրդի միջից դուրս եկող ապստամբությունն ու խռովությունը հայերին կօգնի հասնել Ցեղասպանության միջազգային ճանաչմանը, այլապես ըստ նրա, այս քաղաքական խնդիրները կշարունակվեն և ձգձգվեն:
Այս ամենին զուգահեռ` հոգևորականը 20 օր լինելով Ստամբուլում, այլ մտահոգություն ևս ունի. «Հայ երիտասրդների 60 տոկոսը ամուսնանում է թուրքերի հետ: Նրանք թուրք աղջիկների կամ տղաների հետ ընտանիք են ստեղծում և հեռանում են հայկականությունից: Պոլսահայ համայնքը երևի այդքան չի կարողանում այն հայկական սնուդն ապահովել, որը պետք է, այդ իսկ պատճառով թուրքանում են աստիճանաբար: Պատրիարքությունն էլ արդեն այն հզոր զենքը չէ հայերի համար, ինչպես ժամանակին էր»։
«Օրինակ ես այնտեղ էի, երբ ինձ պատմեցին, որ մոր թաղմանը թրքացած որդին հայտարարել է, եկեք չմոռանանք, որ այսօր Մուհամեդ մարգարեի տարեդարձն է: Սա իսկապես մեծ ցավ է մեզ համար»,- եզրափակեց նա:
http://tert.am/am/news/2012/02/19/armenia-genocide/
Leave a Reply