Գերմանիան մեղսակի՞ց է ցեղասպանությանը

Ի՞նչ նպատակ է հետապնդում Թուրքիայի ԵՄ հարցերով նախարարը` եվրոպական երկրներում պարբերաբար Հայոց ցեղասպանության փաստը ժխտող հայտարարություններ անելով։ ԳԱԱ Արեւելագիտության ինստիտուտի տնօրեն Ռուբեն Սաֆրաստյանի կարծիքով սա Թուրքիայի սադրիչ դիվանագիտության դրսեւորումներից է, որի թիրախը Եվրոպայի հասարակական կարծիքն է։

«Թուրքերը նպատակ ունեն հակաֆրանսիական տրամադրություններ ստեղծել Եվրոպայում, որպեսզի ցույց տան, թե ինչ աբսուրդ է ցեղասպանությունների ժխտումը քրեականացնող օրենքների ընդունումը», – «Ա1+»-ի հետ զրույցում նշեց պարոն Սաֆրաստյանը։

Նա նկատեց, որ Էղեմեն Բաղըշը Թուրքիայի կառավարության շարքային անդամ չէ, եւ նրա ասածները պետք է ընկալել որպես Թուրքիայի իշխող վերնախավի նեղ շրջանակի դիրքորոշում։

«Կարծում եմ, որ Բաղըշը հետագայում նաեւ արտգործնախարարի պաշտոնի հարմար թեկնածու է, այնպես որ, նրա ասածները պետք է լուրջ ընդունել»,- նշեց թուրքագետը։

Պարոն Սաֆրաստյանն անդրադարձավ նաեւ Բաղըշի՝ Գերմանական Die Welt պարբերականին տված հարցազրույցին, որով թուրք նախարարը կոչ էր անում պատմաբանների առաջ բացել Գերմանիայի ռազմական արխիվները։ Ըստ թուրքագետի` Անկարան այս քայլով փորձում է ժխտողականության հարցում իր դաշնակիցը դարձնել Գերմանիային` ակնարկելով 20-րդ դարում նրա գործած հանցանքների մասին։

«Օսմանյան բանակի ղեկավարությունը Առաջին աշխարհամարտի ժամանակ մի զգալի մասով գտնվում էր գերմանացիների ձեռքում։ Մասնավորապես բանակի գլխավոր շտաբի պաշտոնը սովորաբար գերմանացու էր վստահվում։ Դրանցից վերջինը՝ գեներալ ֆոն Զեկտը, երբ 1918-ին հեռանում էր Թուրքիայից, որոշ տվյալներով իր հետ տարավ զգալի քանակությամբ փաստաթղթեր, որոնք այժմ գտնվում են Գերմանիայի ռազմական արխիվներում։ Հավանական է, որ դրանք ապացուցում են Գերմանիայի մեղսակցությունը Մեծ Եղեռնին», – նկատեց պարոն Սաֆրաստյանը։

Նշենք, որ Թուրքիան այս հարցում թիրախ է ընտրել Գերմանային այն բանից հետո, երբ այդ երկրում Ֆրանսիայի օրինակով Հայոց ցեղասպանության մերժումը քրեկանացնելու վերեբերյալ քննարկումներ սկսվեցին:

Հիշեցնենք, որ Ֆրանսիայի Սենատւմ հունվարի 23-ին ընդունված՝ ցեղասպանությունների ժխտումը քրեականացնող օրինագծի սահմանադրականության հարցը Ֆրանսիայի խորհրդարանի երկու պալատների ավելի քան 100 պատգամավորների նախաձեռնությամբ Սահմանադրական խորհուրդը կքննի մինչեւ փետրվարի վերջը։

http://www.a1plus.am/am/politics/2012/02/15/ruben-safrastyan#.Tzvpw0Bey9k.facebook