Մալաթիոյ Չաւուշօղլու շրջանին՝ Հրանդ Տինքի ծնած թաղամասին մէջ գտնուող Թաշհորոն (17-րդ դար), ինչպէս նաեւ Մալաթիոյ ենթակայ Վանք գիւղի Վանք (19-րդ դար) եկեղեցին պիտի նորոգուին: Այս մասին կը յայտնէ թրքական «Զաման» թերթը:
Եկեղեցիներու վերականգման ծրագիրը աւարտած է եւ ներկայացուած Սուազի մշակույթի եւ բնական ժառանգութեան շրջանային խորհուրդին հաստատման:
Մալաթիոյ նահանգապետ Ուլվի Սարան յայտնած է, թէ յատուկ ուշադրութիւն կը դարձուի քաղաքին պատմաշակութային կառոյցներուն: Չաւուշօղլու թաղամասին մէջ գտնուող Թաշորոն եկեղեցին եւ Վանք գիւղի Վանք եկեղեցին վերականգնելու համար նախաձեռնութիւններ սկսած են:
Սարան նաեւ ըսած է, թէ Չաւուշօղլու թաղամասին մէջ գտնուող Թաշհորոն եկեղեցին եւ Մալաթիոյ ենթակայ Վանք գիւղի Վանք եկեղեցին դեռ մեծ մասամբ կանգուն են: «Մէկ տարիէ ի վեր սկսած վերականգման ծրագիրը արդէն պատրաստ է։ Կը մնայ նահանգին ենթակայ պաշտպանութեան եւ վերահսկողութեան գրասենեակի (KUDEB) հետազօտութիւնը եւ Սուազի մշակոյթի եւ բնական ժառանգութեան պահպանման շրջանային խորհուրդի հաստատումը: Այնուհետեւ` հաւանաբար գարնան, պիտի սկսին եկեղեցիներու վերականգման աշխատանքները»,- ըսած է Սարան:
Leave a Reply