Թող փոքրամասնություններին հնարավորություն տան պաշտոններ զբաղեցնել Թուրքիայի պետական համակարգում

ԹԱՄԺ-ի Սահմանադրական հանձնաժողովին ներկայացվելիք առաջարկների փաթեթի շնորհիվ փոքրամասնության ներկայացուցիչներին կարող է հնարավորություններ տրվել` պետական համակարգում պաշտոններ ստանալու ուղղությամբ: Այդ մասին հաղորդում է թուրքական http://www.haber3.com լրատվական կայքը: Աղբյուրի փոխանցմամբ` եթե վերջին րոպեին որևէ բան չփոխվի, ԹԱՄԺ-ի Սահմանադրական հանձնաժողովը փետրվարի 20-ին ունկնդրության կարժանացնի Պոլսո հունաց պատրիարք Բարդուղիմեոսին, որը կպահանջի աջակցություն ցուցաբերել փոքրամասնություններին պատկանող դպրոցներին և բացել հունական Հոգևոր դպրոցը (Ruhban Okulu): Նախատեսվում է նաև, որ Պոլսո հունաց պատրիարքը հանդես կգա դպրոցական դասագրքերից հայերի և հույների հանդեպ ատելություն հարուցող արտահայտությունների վերացման և Թուրքիայի Կրոնական գործերի վարչության բյուջեից փոքրամասնական համայնքներին ևս մասնաբաժին հատկացնելու պահանջներով:

Պոլսո հունաց պատրիարքից հետո հիշյալ հանձնաժողովը նոր սահմանադրության մշակման վերաբերյալ առաջարկներ լսելու համար ունկդրության կհրավիրի նաև մյուս ազգային փոքրամասնական համայնքների ներկայացուցիչներին: Հանձնաժողովը նմանապես հաշվի կառնի հրեական և ասորական համայնքների առաջարկները:

Ստացված տեղեկության համաձայն` հունական, հայկական, հրեական և ասորական համայնքներն ավարտել են նոր սահմանադրության մշակմանն առնչվող իրենց առաջարկներին ուղղված աշխատանքները: Նշյալ փոքրամասնությունների համատեղ առաջարկությունների փաթեթում գլխավոր տեղ են զբաղեցնում փոքրամասնությունների կրթական խնդիրները: Ըստ Լոզանի պայմանագրի` պետական կրթական համակարգում ոչ մուսուլմանական վաքըֆներին պետք է հավասար աջակցություն ցուցաբերվի: Թեև մինչև 1974 թ. այդ օգնությունը մասամբ ցուցաբերվել է, սակայն հետագայում վերացվել է:

Առաջարկությունների փաթեթում ընդգծվում է, որ փոքրամասնությունները չեն կարողանում պաշտոններ զբաղեցնել պետական սեկտորում, և պահանջվում նրանց համար ուղի հարթել դեպի այնպիսի բարձր բյուրոկրատական պաշտոններ, ինչպիսիք են դատավորի, դատախազի աթոռները:

Փաթեթում նաև շեշտվում է, որ Թուրքիայում քահանաների և րաբբիների աշխատավարձները պետք է վճարվեն պետության կողմից, և պահանջվում, որպեսզի Թուրքիայի Կրոնական գործերի վարչության բյուջեից մասնաբաժին հատկացվի նրանց:

Փաթեթում նաև նշվում են հետևյալ պահանջները. «Թող համայնքներին իրավաբանական անձի կարգավիճակ շնորհվի, որպեսզի նրանք կարողանան գույքի տեր դառնալ, փոխանակել վաքֆային բաժնետոմսերը, օգտվել ԵՄ հիմնադրամների օգնություններից: Թող դասագրքերից և պատմության մասին գրքերից հանվեն հայերի, հույների և հրեաների վերաբերյալ այնպիսի արտահայտություններ, ինչպիսիք են` «Նրանք կոտորած են արել: Մեզ թիկունքից հարվածել են» նախադասությունները: Հեռուստատաալիքներով փոքրամասնությունների նկատմամբ բացասական տրամադրություններ ստեղծելը ուղի է հարթում ատելության դրդմամբ կատարված այնպիսի ոճրագործությունների, ինչպիսին է, օրինակ, Հրանտ Դինքի սպանությունը: Թող միջոցներ ձեռնարկվեն դրա առաջն առնելու ուղղությամբ»:

15.02.2012

Akunq.net