Բաղըշի հերթական փարիսեցիությունները

 Թուրքիայի` Եվրամիության հարցերով նախարար Էգեմեն Բաղըշը հերթական անգամ հանդես է եկել փոքրամասնությունների նկատմամբ Թուրքիայում տարվող խտրական քաղաքականությունը քողարկող հայտարարություններով:

Ինչպես հաղորդում է «Արմենպրես»–ը` վկայակոչելով CNNTurk հեռուստաալիքը, Թուրքիայի քաղաքացի տարբեր կրոնական խմբերի ներկայացուցիչների հետ հանդիպման ժամանակ Բաղըշն ասել է, թե անցյալում տեղի ունեցած ցավալի իրադարձությունները չեն մոռանալու:

«Թուրքիայի պատմության ընթացքում ցավալի իրադարձությունների են բախվել երկրի բոլոր հատվածները: Հրանտ Դինքի սպանությունը մեր բոլորի ընդհանուր ցավն է: Վարչապետ Էրդողանի` նվազագույնը երեք երեխա ունենալու մասին հորդորը վերաբերվում է Թուրքիայի բոլոր քաղաքացիներին, այդ թվում նաեւ կրոնական փոքրամասնություններին», -ասել է նա:

Հանդիպմանը մասնակից կրոնական փոքրամասնությունների ներկայացուցիչների այն դժգոհությանը, որ իրենց զավակները չեն կարողանում պետական պաշտոնյաներ դառնալ, Բաղըշն ասել է. «Ազգությամբ հայ Լեո Հալեպլին Եվրամիության հարցերով մասնագիտական քննությունները հաղթահարեց, սակայն, նա  Թուրքիայի ԱԳՆ-ում աշխատանքի չընդունվեց` այն ժամանակ այդտեղ տիրող մտածելակերպի պատճառով: Այժմ այդ պատերն ու նախկին խոչընդոտները վերացված են: Պետական աշխատանքի անցնելու համար կարող են դիմել բոլորը»: Բաղըշի այս փարիսեցիական պատասխանը կասկածանքով է ընդունվել հանդիպման մասնակիցների կողմից: 

Թուրքիա վերադառնալ ցանկացող ոչ մահմեդականներին քաղաքացիություն տալու հարցին ի պատասխան` Բաղըշն ասել է, թե նման մարդկանց համար թուրքական պատկան կառույցները «հեշտացված գործառույթներ են իրագործում»` չպարզաբանելով, թե ինչ պետք է հասկանալ «հեշտացված գործառույթների» տակ:

http://armenpress.am/arm/news/679908/baxyshi-hertakan-pariseciutyunnery.html