Ախթամարի Սրբ Խաչ եկեղեցին չի վերականգնվել թուրքական պետության միջոցներով

Թուրքիայում ընդհանրապես ոչ մի եկեղեցի կամ ազգային փոքրամասնության մշակութային օջախ պետական միջոցներով չի վերականգնվել:

Թուրքիայում եկեղեցիների վերանորոգումը դարձել է պետական մաֆիայի գործունեության ոլորտ: Բոլոր եկեղեցիները, այդ թվում նաև հայկականը, իսկ դրանք մատների վրա կարելի է հաշվել, վերականգնվել են Եվրոմիության դրամաշնորհային և տրանսֆերտային միջոցներով:

Ամեն տարի Եվրոմիությունը ֆինանսական միջոցներ է հատկացնում Եվրոմիության անդամության թեկնածու երկրներին` որպես նպատակային օգնություն: Թուրքիան ևս ստանում է շուրջ 200 մլն եվրո կարգի գումար: Այդ օգնության շրջանակներում թեկնածու պետությունները պարտավորվում են նաև հոգալ ազգային և կրոնական փոքրամասնությունների հավատքի, մշակույթի օջախների պահպանման և վերականգնման ծախսերը:

Եվրոմիության կողմից ստացված գումարների հաշվին է վերականգնվել նաև Ախթամարի Սրբ Խաչ եկեղեցին, թեև թուրքական քարոզչությունը պնդում է, որ այն իրականացվել է պետական միջոցներով: Սակայն թուրքերը չեն ուզում խոստովանել, որ այդ 2 մլն եվրոն թուրքական պետությանը հատկացրել էր Եվրոմիությունը` հատուկ Ախթամարի Սրբ Խաչ եկեղեցու վերանորոգման համար: Ինչևէ, այժմ ազգային փոքրմասնությունների և եկեղեցիների վերականգնման գործը գտնվում է շինարարական մաֆիայի ձեռքում:

Բանն այն է, որ Եվրոմիությունը, ուղղակի տրանսֆերտների ձևով տվյալ երկրին ֆինանսներ հատկացնելուց զատ, նաև դրամաշնորհային ծրագրեր է իրականացնում եկեղեցիների վերականգնման նպատակով: Թուրքիայում հատուկ այդ նպատակով արագ ձևավորված ոչ կառավարական կազմակերպությունները մասնակցում են դրամաշնորհային մրցույթին, վերցնում գումարները, իսկ անբարեխիղճ շինարարները կամ անորակ են կառուցում կամ էլ` կիսատ թողնում գործը:

Եվ միշտ պարզվում է, որ այդ գումարով կարելի էր երկու եկեղեցի վերանորոգել:

Խնդիրն այն է, որ հայկական համայնքը և Պոլսո պատրիարքարանը իրավական կարգավիճակ չունեն, չեն կարող առքի ու վաճառքի գործարքներ կատարել և ամենակարևորը` պաշտոնապես իրավունք չունեն մասնակցելու Եվրոմիության կողմից եկեղեցիների վերանորոգման համար հայտարարվող դրամաշնորհային մրցույթներին: Դրան մասնակցում են թուրքերի կողմից հիմնված ոչ կառավարական կազմակերպությունները:

http://www.armweeklynews.am/awn/f12/am_1054.htm