Քեն Խաչիկյանը տաս հարց է հղել Քլինթընին

Ամերիկայի Հայ Դատի հանձնախմբի նախագահ Քեն Խաչիկյանը Միացյալ Նահանգների արտգործնախարար Հիլարի Քլինթընին հղել է տաս ուղղակի հարց, որոնք վերաբերում են Հայոց ցեղասպանությանը վերաբերող ԱՄՆ-ի քաղաքականության:

Հարցերն ուղղվել են Միացյալ Նահանգների արտգործնախարարությանն հասցեագրված նամակում, որտեղ արտահայտվել է նաև ամերիկահայ համայնքի զայրույթը` Հայոց ցեղասպանության հանցագործությունը «պատմական քննարկումների առարկա» անվանելու առիթով:

Ամերիկայի Հայ Դատի հանձնախմբի մամուլի հաղորդագրության համաձայն,` ԱՄՆ-ի արտգործնախարի կողմից արված արտահայտությունը, որն առաջացրել է համայն հայության զայրույթը, նկարագրվել է կոնգրեսականների՝ Կալիֆորնիա նահանգի դեմոկրատ Ադամ Շիֆի և Իլինոյս նահանգի հանրապետական Ռոբերտ Դոլդի կողմից շրջանառության մեջ դրված նամակում որպես «դիրքորոշում, որը Միացյալ Նահանգների բարձրագույն դիվանագետի կողմից վերջին տարիների  շատ ավելի մոտ է Թուրքիայի կառավարության զբաղեցրած դիրքին, քան վերջին տարիներին այս պաշտոնը զբաղեցրած ԱՄՆ-ի որևէ արտգործնախարարի դիրքորոշումը»:

Հայոց ցեղասպանության ճանաչման մասին Ներկայացուցիչների պալատի թիվ 304 բանաձևի հեղինակ ԱՄՆ-ի այս երկու կոնգրեսականներն այժմ ստորագրություն են հավաքում՝ ԱՄՆ-ի արտգործնախարարին իր մեկնաբանություններից հրաժարվելու պահանջով պաշտոնական նամակ հղելու նպատակով:

Ամերիկայի Հայ Դատի հանձնախմբի վեց էջանոց նամակում Հանձնախմբի նախագահ Քեն Խաչիկյանը Միացյալ Նահանգների արտգործնախարար Հիլարի Քլինթընին հղել է հարցեր ԱՄՆ-ի ներկա և նախկին վարչակազմերի կողմից Թուրքիային հանդարտեցնելուն ուղղված արդեն մոտ մեկ դար տևող քաղաքականության վերաբերյալ՝ «քաղաքականության, որը իրականացվում է մարդու իրավունքների հիմնահարցում Ամերիկայի կողմից կատարվող փոխզիջումների հաշվին»:

«Այս հարցերին ազնիվ և բաց պատասխանները Հայոց ցեղասպանությանը վերաբերող Միացյալ Նահանգների քաղաքականությանը կհաղորդեն մեծ անհրաժեշտություն ունեցող թափանցիկություն, ինչպես նաև բովանդակալից հիմք կդառնան կառավարության և քաղաքացիական հասարակության միջև Թուրքիայի կողմից Հայոց ցեղասպանությունը ժխտելուն ուղղված քաղաքականությանը Միացյալ Նահանգների հանցակցությանը վերջ տալու քննարկման համար», – ասել է Խաչիկյանը:

«Ավելին՝ այս հանցագործության ամբողջական պաշտոնական ճանաչումը, որը կդառնա Ամերիկայի նկատմամբ Թուրքիայի կողմից «լռեցնելու կանոն» սահմանելու ջանքերի հրապարակային ժխտում, կծառայի որպես աշխարհում մարդկությունը խոշտանգող ցեղասպանությունները դադարեցնելու ուղղությամբ նշանակալից քայլ», – ասել է Ամերիկայի Հայ Դատի հանձնախմբի նախագահ Քեն Խաչիկյանը:

Հիշեցնենք, որ ԱՄՆ-ի արտգործնախարար Հիլարի Քլինթընը հունվարի 26-ին Միացյալ Նահանգների արտաքին գործերի նախարարությունում դիվանագիտության զարգացման վերաբերյալ անցկացված հանդիպման ժամանակ խոսելով Հայոց ցեղասպանությանը վերաբերող հարցի մասին, մասնավորապես ասել էր.

«Կարծում եմ՝ ճիշտ կլինի ասել, որ այս հարցը միշտ դիտվել է, և կարծում եմ, որ դա է ճիշտ, որպես պատմական քննարկումներին, այլ ոչ թե քաղաքականությանը վերաբերող խնդիր: Եվ, իմ կարծիքով, Միացյալ Նահանգների կառավարությունը ճիշտ դիրք է զբաղեցնում այս հարցում, քանի որ, անկախ այն բանից, թե որքան զարհուրելի կարող է լինել իրադարձությունը կամ դրա հետևանքով առաջացող հույզերը, կարծում եմ՝ պատմական խնդիրները լուծելու համար կառավարությանը տրված իշխանության օգտագործումը բացում է մի դուռ, որով անցնելը շատ վտանգավոր է»:

http://www.voanews.com/armenian/news/usa/hachikian-ten-questions-clinton-139081669.html