Այն, որ Մալաթիայի քաղաքապետարանի հանձնարարությամբ օրեր առաջ քանդվեց Մալաթիայի հայերի գերեզմանոցում կառուցվող պահակատունն եւ մատուռը, Թուրքիայի հայերին հարկադրեց միջոցներ ձեռնարկել վտանգի տակ գտնվող հայկական շինությունների պահպանման համար: Այդ մասին հաղորդում է թուրքական «Hürriyet Daily News»-ը:
«Հանձնաժողովի ստեղծման գաղափարը կարող էր մասսայականություն վայելել, սակայն մենք առաջին հերթին պետք է հաշվի առնենք այն իրավիճակը, որում հայտնվել է Թուրքիան: Մալաթիայի օրինակը չի կարող ամեն տեղ անցնել»,-ասել է Մալաթիայի ֆիլանտրոպյան ասոցիացիայի (HAYDER) նախկին ղեկավար Կարո Պալյանը:
«Մենք ամբողջ Անատոլիայի տարածքով գերեզմաններ ենք ունեցել, որոնք թվագրվում են շուրջ հազար տարի, բայց դրանց վրա կամ ճանապարհներ, կամ էլ նոր շինություններ են կառուցել: Արդեն հնարավոր չէ դրանք վերականգնել, բայց անհրաժեշտ է մնացածները պահպանել»,-նշել է Փայլանը:
Ասոցիացիան, որն առաջինն էր հայկական հուշարձանների խնդիրը ներկայացրել հասարակության ուշադրությանը, շարունակում է հեռախոսազանգեր ստանալ երկրի այլ շրջաններում հայկական կառույցների կարգավիճակի վերաբերյալ:
«Մենք աստիճանաբար գնահատում են հարցումները»,-ասել է Փայլանը, բայց հավելել, որ ներկա պահին չեն համարձակվում հետագա քայլեր ձեռնարկել: Թուրքիայի վարչապետ Ռեջեփ Թայիփ Էրդողանի եւ Մալաթիայի քաղաքապետի կողմից ցուցաբերվող հետաքրքրությունը համարելով ոչ անկեղծ` Փայլանը նշել է, որ նրանք վախեցել են հասարակության արձագանքից:
«Եթե նրանք իսկապես անկեղծ են, ապա պետք է մեզ վերադարձնեն Մալաթիայի 300-ամյա եկեղեցին` Սուրբ Երրորդությունը, որը նրանք կոչում են Թաշհորոն, այլ ոչ թե այն դարձնեն մշակույթի կենտրոն»,-ասել է Փայլանը` հավելելով, որ մտադիր են առաջիկա օրերին այդ հարցով դիմել Մալաթիայի նահանգապետի գրասենյակ:
Հիշեցնենք, որ փետրվարի 3-ին Մալաթիայի քաղաքապետարանի աշխատակիցները քանդել են հայկական բազմադարյա գերեզմանոցի համալիրը, այդ թվում` Վերջին Աղոթք մատուռը: Հասարակության շրջանում առաջացած բողոքների հետեւանքով Մալաթիայի քաղաքապետարանը խոստացել է վերականգնել համալիրը իր միջոցների հաշվին:
http://news.am/arm/news/92788.html
Leave a Reply