Մալաթիայի նահանագապետարանը ավարտին է հասցրել հայկական 2 եկեղեցիների վերանորոգման նախագիծը եւ ուղարկել է Սվասի (Սեբաստիա) մշակութային արժեքների պահպանության շրջանային խորհուրդ՝ հաստատման համար։
Թուրքական Aktifhaber կայքի փոխանցմամբ՝ վերանորոգման նախագծերը վերաբերում են Մալաթիա քաղաքի Չավուշօղլու թաղամասում գտնվող 250-ամյա հայկական Թաշհորոն (Սուրբ Երրոդություն) եկեղեցուն եւ Մալաթիա քաղաքի մոտակայքում գտնվող Վանք գյուղի հայկական եկեղեցուն։
Մալաթիայի նահանգապետ Ուլվի Սարանը նշել է, թե հայկական եկեղեցիների վերանորոգման նախագծի վրա մոտ 1 տարվա աշխատանքներն ավարտին են հասել, եւ մնում է` միայն հաստավի, որից հետո կսկսվի եկեղեցիների վերանորոգումը։ Նա պնդել է, թե Մալաթիայում մեծ նշանակություն են տալիս պատմական եւ մշակութային արժեքների պահպանությանը։
Նշենք, որ Դինքի ծննդավայրում՝ Մալաթիայի Չավուշօղլու թաղամասում գտնվող Թաշհորոն եկեղեցու վերանորոգման շուրջ ավելի վաղ համաձայնության էին եկել Ստամբուլի, Մալաթիայի հայերը եւ Թեփեբաշը մզկիթներ կառուցող հիմնադրամը, որը նախորդ տարի հայտարարել էր, թե ստանձնում է հայկական Թաշհորոն եկեղեցու վերանորոգումը, սակայն ֆինանսական դժվարությունների պատճառով չի կարողացել իրականացնել այդ որոշումը։
Հիշեցնենք, որ օրեր առաջ Մալաթիայի քաղաքապետարանի հանձնարարությամբ քանդվել է Մալաթիայի հայերի գերեզմանոցում կառուցվող պահակատունն ու մատուռը, որից հետո Մալաթիայի քաղաքապետը պնդել էր, թե շինությունները սխալմամբ են քանդել եւ խոստացել վերականգնել վնասը։
Leave a Reply