Բաթմանում բնակվող հայ լրագրող Ջևաթ Սինեթը հաշմանդամության վկայական ստանալու նպատակով դիմել է Բաթմանի նահանգապետարանի Սոցիալական ծառայությունների նահանգային վարչությանը, որտեղ ստորացման է ենթարկվել` իր հավատքի, ազգության և հաշմանդամ լինելու պատճառով: Թուրքական NTV հեռուստաընկերության փոխանցմամբ, չնայած Սինեթի բողոքներին, տվյալ պաշտոնյայի դեմ դատական գործ չի հարուցվել: Սինեթը հայտնելով, որ չի կարող մոռանալ իր ապրումները, նշել է. «Այնտեղի պաշտոնյան ինձ վիրավորեց` ասելով. «Քո անձնագրում քրիստոնյա է նշված: Դու Բաթմանի հայերի՞ց ես: Մի՞թե քեզնով պիտի զբաղվենք: Այդ դեպքում այս հաշմանդամների հետ ո՞վ զբաղվի»: Նրանց արածը շատ է ինձ վիրավորել: Միակ բանը, որ կարող էի անել, արդարադատությանն ապավինելն էր: Ես բողոքեցի, բայց դատարանը իմ օգտին վճիռ չկայացրեց: Ես էլ դիմեցի Մարդու իրավունքների եվրոպական դատարան»:
Նշենք, որ դեպքը տեղի էր ունեցել 2010 թ. սեպտեմբերի 15-ին, որից հետո Սինեթը դիմել էր Բաթմանի դատախազությանը, սակայն վերջինս մերժել էր Սինեթի` հետաքննություն սկսելու պահանջը: Սինեթի հայցը մերժել էր նաև Միդյաթի ծանր քրեական հանցագործությունների դատարանը: Սինեթն էլ Թուրքիայում ապրող ոչ մուսուլմանների հանդեպ կրոնական և ազգային խտրականության և հաշմանդամ քաղաքացուն վիրավորելու մեղադրանքներով դիմել էր Եվրոպայի մարդու իրավունքների դատարան:
10.02.2012
Akunq.net
Leave a Reply