Եկեղեցու սեփականության վկայականը նրա մոտ է

Տրապիզոնում 1424 թ. կառուցված և ավերակ վիճակում գտնվող Քայմաքլը հայկական եկեղեցու, վերջինիս մոտ գտնվող մատուռի և վանքի սեփականության վկայականը պատկանում է 78 տարեկան Հաշիմ Քանթեքինին:

Այդ մասին հաղորդում է «Անադոլու» լրատվական գործակալությունը: Աղբյուրի փոխանցմամբ` Քայմաքլը եկեղեցին գտնվում է Տրապիզոնից 3 կմ հարավ-արևելք` Չուքուրչայըր քաղաքի Մըսըր թաղամասի Մանասթըր պողոտայի վրա: Դեյիրմենդերե հովտին նայող հատվածում 1424 թ. կառուցված սույն վանական համալիրը բաղկացած է եկեղեցուց, զանգակատնից, փոքրիկ մատուռից և վանքի կառույցներից: Թեև այն բազմիցս վերանորոգվել է, սակայն ներկայում ավերակ վիճակում գտնվող եկեղեցու և մատուռի որոշ հատվածներ այրված են:

Եկեղեցու սեփականության վկայականը գտնվում է 78 տարեկան Հաշիմ Քանթեքինի ձեռքում, ով իր կնոջ` Քեզիբան Քանթեքինի հետ միասին բնակվում է նույն հողատարածքի վրա հետագայում կառուցված տանը: Քանթեքինը, «Անադոլու» գործակալությանը տված հարցազրույցում հայտնելով, թե սույն հողատարածքը իրեն հորից է մնացել, նշել է. «Այս տարածքը իրար մեջ կիսեցինք եղբայրներով: Այն հատվածը, որտեղ գտնվում էր Քայմաքլը եկեղեցին և վերջինիս պատկանող մասերը, ինձ բաժին հասավ: Ես այստեղ եմ ծնվել ու մեծացել: Իմ հնարավորությունների սահմաններում պահպանել եմ եկեղեցին: Եկեղեցու այցելուները չեն կարողանում հենց այնպես մուտք գործել. պետք է բանալին ինձնից վերցնեն, որ մտնեն: Գալիս են մեր տուն, բանալին տալիս ենք, այցելում են եկեղեցի և հեռանում»:

10.02.2012

Akunq.net