Ֆրանսայի հրեաներու ներկայացուցչական խորհորուրդի (CRIF) աւանդական ճաշկերոյթին խօսք առնելով՝ Ֆրանսային նախագահ Նիքոլա Սարքոզի Հրեական Ողջակիզումը եւ Հայկական Ցեղասպանութիւնը դիտարկած է նոյն պարունակին մէջ: Այս մասին կը յայտնէ թրքական «Միլլիէթ» թերթը:
Սարքոզի ըսած է, որ հրեաներուն դէմ իրագործուած խտրականութիւնն ու վիրաւորանքը 65 միլիոն ֆրանսացիին հարցն է: «Թուրքիա մեծ երկիր է, մեծ քաղաքակրթութիւն, բայց ամբողջական իմաստով մեծ ըլլալու համար պէտք է իր պատմութեան հետ դէմ յանդիման կանգնի: Բոլորը պէտք է իրենց պատմութեան ե՛ւ լուսաւոր, ե՛ւ մութ կողմերը միաժամանակ տեսնելու կարողութիւնը ունենան»,- ըսած է ան:
Ան աւելցնելով ըսած է, թէ Ֆրանսան միշտ վատ վերաբերումի արժանացած ժողովուրդներուն կողքին եղած է: «Ասոր մասին կ’ուզեմ մտածէք. Եթէ մեր երկիրը գոյութիւն ունեցող ցեղասպանութեան մը փաստը ժխտէ, օր մըն ալ Հրեական Ողջակիզումը մերժելու փաստին դէմ յանդիման գալու պատրաստ եղէք: Մենք ասիկա ոչ թէ պատահականութեան, այլ սկզբունքի հարց կը տեսնենք: Եթէ Թուրքիան իր պատմութիւնը դարձեալ աչքէ անցնէ, յարգանք կը շահի: Ասիկա կ’ըսեմ երկրի մը, որ Ֆրանսայի բարեկամ կը համարեմ», – ըսած է Սարքոզի:
Leave a Reply