Ֆրանսիան և Սփյուռքը հասան իրենց նպատակին

Վերջին երեք ամսում թուրքական մամուլում Հայոց ցեղասպանության հարցը երկրորդ դիրքում է Սիրիայի դեպքերից հետո:

 Թուրքական հեղինակավոր չորս լրատվամիջոցները` Hurriyet, Milliyet, Radikal, Sabah, վերջին երեք ամսում որպես առաջին էջի գլխավոր նյութ հրապարակել են Սիրիայի դեպքերը` 280 անգամ, և 1915-ի Հայոց ցեղասպանության հարցը ներառող նյութեր` 140 անգամ:

Ֆրանսիայի Խորհրդարանում և Սեանտում Հայոց ցեղասպանության ժխտումը քրեականացնող օրենքի ընդունումից հետո թուրք բարձրաստիճան պաշտոնյաների արտասահմանյան այցերի և պաշտոնական հանդիպումներից հետո կայացած մամլո ասուլիսների ժամանակ պարտադիր հնչում է հարց` Հայոց ցեղասպանության վերաբերյալ: Թուրք պաշտոնյաները ստիպված տալիս են իրենց մեկնաբանությունները, և թուրքական մամուլն էլ պարտադիր անդրադառնում է այդ թեմային:

Կարելի է փաստել, որ այսօր, ի տարբերություն տաս տարի առաջ եղած իրականությանը, թուրքական հասարակության մեջ գերիշխող պատմական «կուրությունն» այլևս չկա: Թուրքիայում այլևս չկա չափահաս քաղաքացի, ով տեղյակ չլինի, որ 1915-ին հայերի հետ կատարվել են սարսափելի իրադարձություններ, և այժմ քաղաքական գործիչները վիճարկում են այդ դեպքերի ցեղասպանություն լինելը կամ չլինելը:

Այժմ յուրաքանչյուր թուրք քաղաքացի, ով այցելում է եվրապական երկրներ, գիտի, որ կամ կենցաղային, կամ էլ պաշտոնական մակարդակով իրեն կարող են հարցնել 1915-ի դեպքերի  մասին:

Եթե տաս տարի առաջ 1915-ի դեպքերի պատմական փաստերի հետ առնչվում էին միայն քաղաքական և սահմանափակ թվով հասարակական գործիչներ, իսկ մամուլը եզակի դեպքերում էր լուսաբանում այդպիսի խնդիրները, ապա այժմ ողջ թուրք հասարակությունն է ներքաշված այդ բանավեճերի մեջ: Կարելի է փաստել, որ Սփյուռքը և Ֆրանսիան հասան իրենց նպատակին, և այժմ 75 մլն բնակչություն ունեցող Թուրքիայի համար 1915-ի Հայոց ցեղասպանությունը դարձել է թիվ մեկ համազգային մարտահրավերը 21-րդ դարում:

Պետք է փաստել նաև, որ Թուրքիայում այսօր իսկ բնակչության մեծամասնությունը ներքուստ համոզված է, որ 1915-ին տեղի է ունեցել ցեղասպանություն, սակայն ժամանակ է պահանջվում, մինչև ներքին համոզմունքը դառնա ազատ արտահայտվելու կարողություն:

08.02.12

armweeklynews.am