«Սպանել է Հրանտ Դինքին, իսկ մի՞թե վատ է արել». գրում է թուրք խմբագիրը

Հայասպան թուրքերի հերոսացումը Թուրքիայում շարունակվում է: CNN Turk-ի փոխանցմամբ` Սամսունում 2 ամիսը մեկ հրատարակվող «Ստատուս քվո» ամսագրի 2012 թ. հունվար-փետրվար ամիսների համարում տպագրվել է նշյալ հանդեսի գլխավոր խմբագիր Օքան Բաշի «Պարոննե’ր, ազգայնամոլները ձեզ ի՞նչ արեցին» վերնագրով հոդվածը, որում թուրք ֆաշիստը գրում է. «Ո՞րն է այդ հակակրանքի պատճառը: Թուրքիա անունը կրող մի պետության` ազգային և հոգևոր արժեքները պահպանել ձգտող քաղաքացիները ի՞նչ պատճառներով են այդչափ անողորմ վերաբերմունքի արժանանում: Հայտնի է, որ այնպիսի կտրիճ տղա, ինչպիսին Օգյուն Սամասթն է, ծանր քրեական պատժի առաջ է կանգնած` Հրանտ կոչեցյալ մի տիպի սպանելու համար, ով բանը հասցրել էր նրան, որ ասել էր, թե «Թուրքի արյունը կեղտոտ է»: Իսկ մի՞թե Սամասթը վատ է վարվել: Ըստ իս` ողջ ազգի հասցեին ծանր վիրավորանքներ տեղացած այդ մարդու մահը արդեն իսկ ցանկալի էր:

Եթե պետությունը չի անում այն գործը, ինչ պետք է անի, եթե նա աչք է փակում այն օտարերկրացու վրա, ով ասում է` «Թուրքի արյունը կեղտոտ է», եթե բացեիբաց ոտնակոխ է անում ազգայնականության սկզբունքը, ինչ է թե` դուր գա հայերին, թող ոչ ոք չնեղանա, բայց տվյալ պարագայում ազգն է միջամտում: Դրա համար էլ այդ մարդուն դատելը ոչ մի իմաստ չունի: Ազգությամբ թուրք քաղաքացիների` «Բոլորս հայ ենք» երգով փողոցներում սադրանքներ հրահրելը ևս այն կետերից մեկն է, որը ոչ մի կերպ չեմ կարողանում ըմբռնել: Ա~յ մարդիկ, մինչ օրս միլիոններով նահատակ ենք տվել: Ազգությամբ հայ քանի՞ քաղաքացու եք տեսել, որ «Բոլորս մեհմեթչիկ ենք», «Բոլորս թուրք ենք» ասելով` փողոցներ թափվեն: Եթե «Բոլորս հայ ենք» ասելով` հրահրիչ քարոզչություն անելը շարունակեք, Հայաստանն այնտեղ է, հենց այնտեղ է ազգային պետությունը, համեցե’ք, գնացե’ք: Իսկ այստեղ Թուրքիա’ն է: Ձեր չափն իմացե’ք»:

08.02.2012

Akunq.net