Թուրքիան չի կարող օրինակ ծառայել տարածաշրջանի երկրների համար

Թուրքիայի գլխավոր ընդդիմադիր Ժողովրդահանրապետական կուսակցության (ԺՀԿ) առաջնորդ Քեմալ Քըլըչդարօղլուն «Washington Post»-ում հրապարակած հոդվածում, քննադատելով իրավական համակարգի անկատարությունը Թուրքիայում, հայտարարել է, որ իր առկա կառուցվածքով այդ երկիրը չի կարող օրինակ ծառայել տարածաշրջանում:

Ինչպես հաղորդում է «Արմենպրես»–ը, «Թուրքիայում ընդդիմությունը լռեցվում է» կոչված հոդվածում Քըլըչդարօղլուն քննադատել է դատական գործերի ձգձգվածությունն ու կալանավորվածների գործերը մինչեւ դատարան հասնելու երկար ժամկետները: «Դատական համակարգը Թուրքիայում վտանգված է: 2007-ից սկսած` թուրքական բանտերում առանց դատական վճիռների հազարավոր մարդիկ կան: Այդ դատական գործերը կարող են առիթ հանդիսանալ Թուրքիայի` անցյալում արած սխալներն ուղղելու համար, սակայն դրա փոխարեն այստեղ լռեցնում են ընդդիմությանը եւ օգտագործում այն ազատությունները ճնշելու համար», -հայտնել է նա:

Նշելով, որ թուրքական բանտերում դատական վճիռ չստացած 8 պատգամավորներ էլ կան, ԺՀԿ առաջնորդն ասել է. «Թուրքիայում մարդիկ մինչեւ մեղքն ապացուցվելը ազատ չեն եւ մեղավոր են համարվում մինչ այդ գործառույթի ավարտը: Իշխող Արդարություն եւ զարգացում կուսակցությունը (ԱԶԿ) դաժան է ընդդիմադիրներին ճնշելու գործում: ԱԶԿ-ը ընդդիմությանը ճնշելու համար հակաօրինական միջոցների է դիմում` օգտագործելով հեռախոսային լսումներ, հարկային պատիժներ եւ ապօրինի տեսանյութեր», -շեշտել է նա:

Քըլըչդարօղլուն նշել է նաեւ, որ Թուրքիան չի կարող մոդել հանդիսանալ արաբական երկրների համար: «Միայն սեփական տարածքում խաղաղություն պահպանող երկիրը կարող է օրինակ ծառայել հարեւանների համար: Իր ներսում բեւեռացումների եւ բաժանումների մեջ հայտնված երկիրը դատապարտված է անհաջողության», -գրել է Էըլըչդարօղլուն:

ԺՀԿ առաջնորդը «Washington Post»-ի իր հոդվածն ավարտել է հետեւյալ կերպ. «ԱԶԿ իշխանությունը չի կարող մնայուն լինել: Մի իշխանություն կարող է ճնշումներով, սպառնալիքներով եւ ազատությունները սահմանափակելով երկարացնել իր կյանքը, սակայն պատմության մեջ ոչ մի նման կառավարություն մնայուն չի եղել: Բացառություն չէ նաեւ Թուրքիան»:

http://armenpress.am/arm/news/678726/turqian-chi-karox-orinak-tsarayel-taratsashrjani-erkrneri.html