ՀԱՍՄԻԿ ՍՏԵՓԱՆՅԱՆ Հայերի ներդրումը Օսմանյան կայսրությունում (Մենագրություն)

744 էջ, 400 լուսանկար, տպաքանակ՝ 300

Տպագրվել է ԳԱՍՊՐԻՆՏ-ում

Հովանավորներ` վարչապետ Տիգրան Սարգսյանը և ԱԺ նախկին խոսնակ Հովիկ Աբրահամյան

Գիրքը նվիրված է Կ.Պոլսի Հայոց Պատրիարքության 550 ամյակին

Գիրքը նվիրված է Օսմանյան կայսրության պալատական, դիվանագիտական, վարչական, դատական, զինվորական բնագավառներում, բանակում ու նոր զարգացող բուրժուական հարաբերությունների մաս հանդիսացող բանկային, արդյունաբերական, ապահովագրական համակարգում, բժշկության, քաղաքաշինության, արհեստների, առևտրի, գիտության, մշակույթի տարբեր ոլորներում` ճարտարապետության, կերպարվեստի, լուսանկարչության, թատրոնի, երաժշտության, կիրառական արվեստների, երկրի տնտեսության համար նոր ձևավորվող կարևորագույն ճյուղերի, ինչպես նաև սպորտի, հասարակական կազմակերպությունների ոլորտում արևմտահայության  ունեցած մեծագույն ներդրմանը։

Տպագրական, հրատարակչական ասպարեզը, հայատառ թուրքերեն ինքնուրույն և թարգմանական գրականությունը անմիջական ազդեցություն են ունեցել թուրք նոր գրականության ու նրա լուսավորիչների սերնդի ձևավորման, թուրքերեն գրական լեզվի, թատրոնի, դրամատուրգիայի, լրագրողական ոլորտների ձևավորման ու զարգացման մեջ։

Հասմիկ Ստեփանյանը շուրջ 40 տարի աշխատում է  ՀՀ ԳԱԱ Արևելագիտության ինստիտուտում։ Նրա աշխատությունները գլխավորապես նվիրված են հայատառ թուրքերեն մշակույթին` ձեռագիր և տպագիր գրականությանը, պարբերական մամուլին, նրա երախտավորներին, հայ-թուրք մշակութային հարաբերություններին և երկրի տարբեր ասպարեզներում նրանց համագործակցությանը, վերարժևորմանը։

Հեղինակը   «Հայատառ թուրքերեն գրականություն» և «Օսմանյան կայսրության մշակույթ» առարկաներ է դասավանդել Երևանի Պետական  համալսարանում, Հր.Աճառյանի անվ. համալսարանում, զեկուցումներով հանդես եկել միջազգային գիտաժողովներում, հեղինակել բազմաթիվ հոդվածներ։

Ուսումնասիրությունն իր ընդգրկման շրջանակով, ծավալով, փաստական, աղբյուրագիտական, լուսանկարչական նյութով բացառիկ ու սպասված հրատարակություն է։

Այն  կոչված է լրացնելու մեր պատմության բազմաթիվ ճերմակ էջերը, վերարժևորելու և թուրքացման, խեղաթյուրման սպառնալիքից փրկելու մեր մշակույթի մի կարևոր, անքակտելի մասը։ Այն կարող է հիմք ծառայել բազմաթիվ նոր ուսումնասիրությունների համար։

07.02.2012

Akunq.net