Դավութօղլուն գաղտնի հեռախոսազանգերով աջակցություն է խնդրել ֆրանսիացի սենատորներից

Համոզված լինելով, որ Ֆրանսիայի Սենատում Ցեղասպանությունների ժխտումը քրեականացնող օրինագիծը հաստատապես կընդունվի, Թուրքիայի արտաքին գործերի նախարար Ահմեդ Դավութօղլուն գաղտնի հեռախոսազրույցներ է ունեցել Ֆրանսիայի Սենատի եւ խորհրդարանի «համոզմունքի երդվյալ առաջնորդների» հետ: Թուրքիայի արտգործնախարարը խնդրել  է նրանց աջակցությունը` օրինագիծը Ֆրանսիայի Սահմանադրական խորհրդում բողոքարկելու հարցում: Այս մասին, ինչպես հաղորդում է «Արմենպրես»–ը, հայտնում է HaberTurk հեռուստաալիքը:

Ըստ թուրքական հեռուստաալիքի` Սենատում օրինագծի ընդունումից անմիջապես հետո Դավութօղլուն այն «չեղյալ դարձնելու դիվանագիտություն» է սկսել` թիրախ դարձնելով Ֆրանսիայի Սահմանդրական խորհուրդը:

«Փարիզում Թուրքիայի դեսպանատունը, հյուպատոսությունները, թուրքական կազմակերպություններն ու Արտասահմանի թուրքերի նախագահությունը խիստ եւ ակտիվ լոբբիստական աշխատանքներ են կատարել, ինչի արդյունքում օրինագիծը բողոքարկվել է: Թուրքիան շարունակում է իր այդ «դիվանագիտությունը»` իրավական գործընթացի վրա ազդելու եւ այն իր օգտին շրջելու համար», -հայտնում է HaberTurk-ը` նշելով, որ Թուրքիայում այժմ քննարկում են այն հարցը, թե ինչպես իրենց կպահեն եւ օրինագծի նկատմամբ կքվեարկեն Ֆրանսիայի Սահմանադրական խորհրդի «Թուրքիայի բարեկամ» անդամները:

Նշվում է, որ Ֆրանսիայի սահմանադրական հանձաժողովի 9 անդամներից Ֆրանսիայի նախկին նախագահներ Ժակ Շիրակն ու Վալերի Դ’Էսթենը «1915-ի հետ կապված դեմ կարծիքներ ունեն»: Սակայն, դրա հետ միասին` Ժակ Շիրակը հայտարարել է, որ Թուրքիան պետք է ճանաչի Հայոց ցեղասպանությունը, Վալերի Դ’Էսթենն էլ դեմ է հանդես եկել Թուրքիայի` Եվրամիությանն անդամակցությանը եւ հայտարարել, որ Թուրքիան եվրոպական պետություն չէ:

Թուրքական կողմը «Թուրքիայի բարեկամ» է համարում Ֆրանսիայի Սահմանադրական խորհրդի նախագահ Ժան Լուիս Դեբրեին, ով Ֆրանսիայի խորհրդարանի նախագահ եղած ժամանակ 2006-ին կանխել է նմանատիպ օրինագծի ընդունումը, եւ բյուջեի նախկին նախարար Միշել Շարազին, ով ավելի վաղ ձեռնպահ է մնացել նման օրինագծերի հարցում: Թուրքական կողմը ակնկալում է, որ խորհրդի անդամ Պյեռ Շթայնմեցը օրինագծի` սահմանադրությանը հակասելու տեսակետ կհայտնի:

http://armenpress.am/arm/news/678097/davutoxlun-gaxtni-herakhosazangerov-ajakcutyun-e-khndrel.html