Ինչի մասին լռում էր Սարկոզին, հայտարարեց ECFR-ը

Միայն հայերի նկատմամբ հարգանքով չէ, որ Նիկոլա Սարկոզին համառորեն օրակարգում է պահում Հայոց ցեղասպանության հարցը:

Իրականում Եվրամիությունում դժգոհ են Թուրքիայի վարած արտաքին քաղաքականությունից, որը հաճախ չի համապատասխանում ոչ Եվրամիության , ոչ էլ ՆԱՏՕ-ի տարածաշրջանային ռազմավարությանը: Եվրոպայի Արտաքին քաղաքականության խորհուրդ Բրյուսելի հետազոտական կենտրոնը` ECFR, հավաստել է, որ մարդու իրավունքների պաշտպանության, տարածաշրջանային համագործակցության և արտաքին քաղաքականության ոլորտներում հակասություններ ամենից շատ առկա են Թուրքիայի հետ:Այդ պատճառով էլ հետազոտական կենտրոնը Եվրամիության և Թուրքիայի համագործակցությունը գնահատել է D կարգով:

Հիշեցնենք, որ այդ կենտրոնը Եվրամիության և Եվրամիության անդամ չհանդիսացող Եվրախորհրդի անդամ երկրների միջև համագործակցության մակարդակը գնահատում է հինգ կարգերով` A, B, C, D, F: Թուրքիան ետ է նահանջել C-ից և հայտնվել է D կարգում:

ECFR-ի փորձագետները պնդում են, որ Եվրամիությունը 2006-ից հետո ընդհանրապես կորցրել է իր ազդեցությունը Թուրքիայի նկատմամբ: Այդ է նաև պատճառը, որ Ֆրանսիան և Գերմանիան կտրականապես դեմ են արտահայտվում Թուրքիայի Եվրամիության անդամությանը:

Հավելենք, որ Ֆրանսիան, պատասխանատվություն կրելով Եվրամիության համար և լինելով հիմնադիր անդամ, փորձում է տարբեր ճանապարհներով «սանձել» Թուրքիային: Նա դա անում է նաև Գերմանիայի փոխարեն, քանի որ Գերմանիայում բնակվող շուրջ 2 մլն թուրքերի առկայությունն այդ երկրին թույլ չի տալիս անել այն, ինչ կարող է անել Ֆրանսիան: Այնպես որ` Նիկոլա Սարկոզիի համառությունը Հայոց ցեղասպանության ժխտումը քրեականացնող օրինագծի հարցում ունի նաև համաեվրոպական պատճառ:

02.02.12

http://www.armweeklynews.am/awn/f12/am_1010.htm