Թուրքիայում հերթական հակահայ հիսթերիայի դեպքն է արձանագրվել:
|
|
Այս անգամ թուրքերը քանդել են Մալաթիա քաղաքի հայկական գերեզմանատանը գտնվող մատուռը:
CNNTurk-ի փոխանցմամբ` ճանապարհային աշխատանքների ժամանակ մասամբ քանդվել էր հայկական գերեզամանատանը գտնվող մատուռը:
Մալաթիացի հայերի միությունը (HAYDER) որոշել էր վերականգնել այն: Մալաթիայի քաղաքպետն էլ նահանգապետի գիտությամբ բանավոր թույլատվություն էր տվել` սկսելու վերակառուցման աշխատանքները:
Աշխատանքներով, որոնք սկսվել էին երեք ամիս առաջ, զբաղվում էր Թուրքիայում հայտնի ճարտարապետ Գևորգ Օզքարագյոզը, ում այդ գործը վստահել էր Պոլսո հայոց պատրիարքարանը:
Սակայն վերջին շրջանում Մալաթիայի քաղաքապետարանը սկսել է տեղի բնակիչներից հարյուրավոր բողոքներ ստանալ, որոնցում նշվում էր, թե «նոր կառույցն ու դրա շինարարությունը խանգարում են մոտակայքում ապրողներին»:
Քաղաքապետարանում էլ չեն հապաղել հաշվի նստել բնակիչների հետ և որոշել են վերջնականապես քանդել հայերի կիսակառույց շինությունը: Առանց տեղյակ պահելու, քաղաքապետարանը հիմնովին քանդել է այն:
Մալաթիացի հայերի միության նախագահ Խոսրով Քյոլեթավթիօղլուն իր խիստ դժգոհությունն է հայտնել այս տմարդի քայլի կապակցությամբ. «Առաջին անգամ քանդելուց արդեն վիրավորել էին, իսկ երկրորդ դեպքում` ցավն աննակարագրելի է: Ո՞ւմ է խանգարում մահացածների հիշատակը հարգելը: Չեմ հասկանում: Շատ վրդովված եմ…»:
Չի բացառվում, որ այս ամենը հետևանք է Ֆրանսիայի խորհրդարանի կողմից ընդունված Հայոց ցեղասպանության ժխտումը քրեականացնող օրենքի:
CNNTurk-ը հոդվածում նշում է նաև, թե «այս ամենը ցույց է տալիս հայերի իրական վիճակը Թուրքիայում»:
03 Փետրվարի 2012
HayNews.am
Leave a Reply