Սուրբ Սարգիսը կտոնվի փետրվարի 4-ին

Սուրբ Սարգսի տոնը այս տարի կնշվի փետրվարի 4-ին` շաբաթ օրը: Ըստ ավանդության` Ս.Սարգիս զորավարը իր որդու` Մարտիրոսի և 14 քաջ մարտիկների հետ նահատակվել է հանուն քրիստոնեական հավատքի: Հավատացյալները նահատակների մարմիններն ամփոփում են Համիան քաղաքում: Սակայն հետագայում Ս. Մեսրոպ Մաշտոց վարդապետը Ս. Սարգսի մասունքները բերում է Կարբի (Աշտարակի շրջան)` տեղում կառուցելով նրա անունը կրող եկեղեցի: Մեր օրերում Ս. Սարգիս զորավարի տոնը հռչակվել է Երիտասարդների օրհնության օր: Սուրբ Սարգիսը համարվում է սիրո բարեխոս:

«Տոնը հատկապես սիրված է երիտասարդների կողմից: Եթե ուրիշ սրբերի չճանաչեն մեր երիտասարդները, ապա Ս.Սարգսին բոլորը գիտեն: Իսկ ժողովուրդը նրան սիրել է հատկապես իր արագահասության համար: Այսօր եկեղեցու համար տոնը ոգևորող է, քանի որ ևս մեկ անգամ հիշում ու տեսնում ենք նրա օրինակելի վարքը և նվիրումը եկեղեցուն», – Tert.am-ի հետ զրույցում ասաց Սուրբ Հովհաննես Մկրտիչ եկեղեցու քահանա Տեր Շմավոն Ղևոնդյանը:

Քահանան նկատեց նաև, որ ի տարբերություն նախորդ տարիների` այժմ հայ երիտասարդները սկսել են ավելի շատ տոնել Սուրբ Սարգսի տոնը:

«Վալենտինը անգամ հայտնի չէ, թե որ եկեղեցու սուրբն է, քանի որ և՛ կաթոլիկ, և՛ ուղղափառ եկեղեցիները ասում են, որ նման սուրբ իրենք չունեն: Սարգիս զորավարին սուրբ է ճանաչել դեռ անհիշելի ժամանակներից ընդհանրական եկեղեցին, այսինքն այս տոնը նշում են ոչ միայն հայերը», – ասաց Տեր Շմավոնը: Քահանան համոզված է, որ սուրբ Վալենտինի տոնը Հայաստան բերեցին այն մարդիկ, ովքեր շահում են դրանից` բիզնեսի տեսանկյունից:

«Մարդիկ իրար այդ օրը սրտիկներ են նվիրում, բացիկներ և այլն: Բայց այդ նույնը կարելի է անել Ս. Սարգսի տոնին և չտառապել օտարամոլությամբ: Սա նման է մի բանի, երբ քո մորը թողնես ու գնաս ուրիշ կնոջը մամա ասես», – ասաց քահանան:

Այս տոնը բացի աղոթքներից, ընթանում է նաև ժողովրդական ավանդույթներով` երիտասարդները աղաբլիթ են ուտում և հույսով սպասում, որ երազում կտեսնեն իրենց կողակցին: Օրվա ավանդույթներից է նաև տան պատշգամբում կամ կտուրին փոխինձ դնելը և եթե դրա վրա հայտնվի սուրբ զորավարի նժույգի պայտի հետքը, ապա տան անդամները երջանիկ են լինելու:

Տեր Շմավոն Ղևոնդյանը հավաստիացրեց, որ ժովողրդական այս ծեսերը չեն հակասում եկեղեցու դավաբանությանը:

«Դրանք ընդամենը գեղեցիկ խաղիկներ են, և այստեղ չկա որևէ գուշակություն կամ կախարդանք: Մարդիկ այդ աղաբլիթը ուտում են, աղոթում ու քնում: Նրանք տարբեր երազներ են տեսնում, բայց դժվար թե գտնվի որևէ մեկը, որ լրջորեն հավատա սրան: Եվ ի վերջո այս ամբողջը հիմնված է մարդկային զգացողությունների վրա»:

Փետրվարի 4-ին Ս.Սարգիս Զորավարի անունը կրող եկեղեցիներում կմատուցվի Ս. Պատարագ, որից հետո երիտասարդների օրհնության կարգ: Այդ օրը Ս. Սարգիս անունը կրող եկեցիները բաց կլինեն մինչև երեկոյան ժամը 21.00-ն: 

http://www.tert.am/am/news/2012/01/31/sargis/