Թուրքիայի Գիտական և տեխնոլոգիական ուսումնասիրությունների հաստատությունում աշխատող հայերը գաղտնի առանձնացվել են` որպես «անվստահելի տարրեր»

Թուրքական NTV հեռուստատեսության հաղորդմամբ` Թուրքիայի ռազմական լրտեսների ամենամեծ խմբի գործի հետաքննության արդյունքում բացահայտվել է, թե ինչպես են գրառվել Թուրքիայի Գիտական և տեխնոլոգիական ուսումնասիրությունների հաստատության (Türkiye Bilimsel ve Teknolojik Araştırma Kurumu-TÜBİTAK) 5000 աշխատակիցները: Պարզվում է` գաղտնի նախագծեր իրականացնող և երկրի առանցքային հաստատություններից մեկը հանդիսացող Թուրքիայի Գիտական և տեխնոլոգիական ուսումնասիրությունների հաստատությունում աշխատող 1048 կադրեր արձանագրվել են որպես «գաղափարներով ձախակողմյան», «ալևի», «իսլամիստ», «հայ», «հրեա» և այլն: Ցուցակում տեղ գտած որոշ աշխատակիցների անունների դիմաց էլ առկա են եղել «պոռնոյի սիրահար», «կնամոլ», «եղբայրը սատանիստ է» և այլ նման նշումներ: Պարզվել է նաև, որ այն կադրերը, որոնց անունների դիմաց եղել են «վստահելի է», «առաջիկայում պաշտոնի բարձրացում է ակնկալում» և այլ նմանատիպ գրառումներ, որոշ ժամանակ անց նշանակվել են կարևոր պաշտոններում:

Ըստ թուրքական «Ռադիկալ» օրաթերթի` 2007-2009 թթ. ընդգրկող այդ թղթապանակը, որում տեղ են գտել հիշյալ հաստատությունում աշխատող մարդկանց վերոնշյալ դասակարգումները, ընդգրկվել է Թուրքիայի ռազմական լրտեսների ամենամեծ խմբի գործի հետաքննությունն իրականացրած դատախազի կազմած մեղադրական ակտում:

01.02.2012

Akunq.net