Դատարանը հայկական վաքըֆին է վերադարձրել նախկին գերեզմանոցը

Ինչպես հաղորդում է թուրքական «Սաբահ» օրաթերթը, հունվարի 24-ին` Ֆրանսիայի Սենատի կողմից Հայոց ցեղասպանության ժխտումը քրեականացնող օրենքն ընդունելուց մեկ օր հետո, թուրքական դատարանի որոշմամբ Յեշիլքյոյի Սուրբ Ստեփանոս հայկական եկեղեցու և դպրոցի վաքըֆին է վերադարձվել հողակտորը, որը մինչև 1925 թ. եղել է հայկական գերեզմանոց և մոտ 50 տարի առաջ բռնագրավվել է: 1925 թ. հետո Յեշիլքյոյի գերեզմանատան շիրիմները տեղափոխվել են այլ գերեզմանոցներ, իսկ 1950-ական թթ. հղատարածքը հանձնել են Ստամբուլի քաղաքապետարանին:

Քաղաքապետարանը գերեզմանոցի 3 332 քառ. մ հողատարածքը օգտագրծել է որպես ժողովրդական շուկա: 3 տարի առաջ քաղաքապետարանի դեմ դատական գործ է հարուցվել հողատարածքի` վաքըֆապատկան նախկին հայկական գերեզման լինելու հիմնավորմամբ: Բաքըրքյոյի 4-րդ քաղաքացիական դատարանը որոշել է հողակտորը վերադարձնել Յեշիլքյոյի  Սուրբ  Ստեփանոս հայկական եկեղեցու և դպրոցի վաքըֆին: Որոշումը հայկական համայնքում ուրախությամբ է ընդունվել: Վաքըֆի նախագահ Հաբիբ Օզֆուրունջուն նշեց, որ հողակտորը մտնում է այն հողատարածքների մեջ, որը սուլթան Աբդուլմեջիդը նվիրել է կայսերական վառոդապետ Դադյանին: Օզֆուրունջուն  նշելով, որ վերջին տարիներին Թուրքիայում կարևոր զարգացումներ են տեղի ունենում, դատական գործընթաացի վերաբերյալ ասաց. «Ուրախ ենք, որ հարցը կարգավորվեց մեր երկրում, մեր իրավական համակարգում»: Այնուհետև հայտնեց. «Հնարավոր է` բեկանման գործընթաց լինի, սպասում ենք գործընթացի ավարտին, որպեսզի գնահատական տանք, դեռ վերադարձնելու 5 անշարժ գույք ևս կա»:

«Սաբահ», 27.01.2012