Այսօր` սեպտեմբերի 29-ին, կկայանա «Մե’նք ենք ուզում ընտրել մեր պատրիարքին» նախաձեռնության անդամների կողմից հարուցված դատական գործի առաջին նիստը: Թուրքական «Էթքին» լրատվական գործակալության հաղորդմամբ` նիստը տեղի կունենա Ստամբուլի 3-րդ վարչական դատարանում ժամը 09:30-ին: Հիշեցնենք, որ Պոլսո հայոց պատրիարք Մեսրոպ Երկրորդի հիվանդության և Արդարություն ու զարգացում կուսակցությունը ներկայացնող կառավարության արգելելու պատճառով պոլսահայ համայնքը չէր կարողացել նոր պատրիարքի ընտրություններ կազմակերպել: Պատրիարքի ընտրության խնդիրն առաջացել էր այն բանից հետո, երբ Արամ Աթեշյանի նշանակումից 5 ամիս առաջ Պոլսո հայոց պատրիարքարանն ընտրություններ կազմակերպելու համար պաշտոնապես դիմել էր Թուրքիայի կառավարությանը, սակայն վարչապետարանն ի պատասխան այդ դիմումին հաղորդել էր, թե ընտրություններ հնարավոր չէ կազմակերպել` քանի դեռ Մեսրոպ պատրիարը ողջ է, և որ կարող է ընտրվել միայն պատրիարքի գլխավոր փոխանորդ` այդ կերպ խախտելով պոլսահայ համայնքի` սեփական կամքով իր հոգևոր առաջնորդին ընտրելու իրավունքը, որից նա օգտվել էր դարեր շարունակ:
Վարչապետարանի պատասխանից հետո Պոլսո հայոց պատրիարքարանի Հոգևոր խորհուրդը, որի նախագահն ի դեպ հենց Արամ Աթեշյանն էր, առանց մյուս թեկնածուներին տեղեկացնելու` հավաքվել էր 48 ժամվա ընթացքում և պատրիարքի գլխավոր փոխանորդ ընտրել արքեպիսկոպոս Աթեշյանին: Սակայն պոլսահայ համայնքը, չհանդուրժելով ընտրության իր իրավունքի խախտումը, դատական գործ էր հարուցել դեպքի առթիվ:
29.09.2011
Akunq.net
Leave a Reply