Բաքվում քննարկել են Նախիջևանում ստեղծված իրավիճակը

«Հեյդար Ալիեւն իշխանության գալու համար Նախիջեւանն օգտագործեց որպես հարթակ: Այսօր Իլհամ Ալիեւը Նախիջեւանը դարձրել է քաղաքական փորձադաշտ: Փորձարկումներ է անում այնտեղ, որ հետո դրանք կիրառի ամբողջ Ադրբեջանում: Այնտեղ մամուլի ազատություն չկա, իրավապաշտպանները չեն կարող գործունեություն ծավալել, թերթերի հրապարակումները եւս արգելվում են, իսկ ինտերնետի օգտագործումը` սահմանափակվում»:

Այս միտքը հնչել է սեպտեմբերի 25-ին Ադրբեջանի դեմոկրատակյան կուսակցության շտաբում տեղի ունեցած մի համաժողովի ժամանակ, ուր քննարկվել է Նախիջեւանի ինքնավար հանրապետությունում ստեղծված իրավիճակը: Կոնֆերանսը նախաձեռնող խմբի համակարգող Իբրահիմ Իբրահիմլին է վերը նշված մեջբերման հեղինակը, այս մասին երեկ հաղորդել է News.am կայքը` հղում անելով ադրբեջանական «Ազադլըգ» թերթին: Կոնֆերանսի ժամանակ ելույթ ունեցած իրավապաշտպան Մելահեթ Նասիբովն անդրադարձել է բնակչության թվաքանակի կտրուկ նվազմանը: «Պաշտոնական վիճակագրությամբ` Նախիջեւանը 450 հազար բնակիչ ունի, սակայն ես փաստում եմ, որ այսօր այնտեղ 120-130 հազար բնակիչ կա: Բնակչության մեծամասնությունը Թուրքիա է հեռանում», ասել է նա: «Ադրբեջանի ժողովրդական ճակատ» կուսակցության ղեկավարի տեղակալ Ասաֆ Գուլիեւը Նախիջեւանում որպես ստեղծված իրավիճակից դուրս գալու ելք առաջարկել է. «Նախիջեւանում դրությունը փոխելու համար պետք է ամբողջ երկրում ստեղծված իրավիճակը, առկա վարչակարգը փոխել: Ժողովրդական ապստամբություն պետք է կազմակերպել: Դրանից հետո Նախիջեւանում եւս դրությունը կշտկվի»:

«ԱԶԳ» ՕՐԱԹԵՐԹ #171

 28-09-2011