Թուրք վերլուծաբան Ռաուֆ Թամերը «Hurriyet» օրաթերթում դիտարկման է առել Անկարայի տարածաշրջանային քաղաքականությունը: Նա նախ նշում է, որ ներկա դրությամբ հայտնի չէ, թե ով ում հակառակորդն է և ով` ում բարեկամը: Նույնիսկ հնարավոր չի լինում թշնամու թշնամուն բարեկամ համարել, քանի որ թշնամիները շուտ-շուտ են փոխվում: Հետևաբար, ըստ Թամերի, նման իրավիճակում գործելը Թուրքիայի համար նշանակում է ականապատ դաշտում քայլել, ինչը ենթադրում է մեծ զգուշավորություն:
Հոդվածագիրը շեշտում է, որ իր խնդիրների լուծման համար պայքարող Թուրքիան շատ ջանք ու էներգիա է ծախսում: Եվ բացի դրանից, երբ Թուրքիան, իբր հումանիզմի բարոյական պարտականությունից ելնելով, ուրիշների համար է կռիվ տալիս, ավելի է հոգնում ու հյուծվում:
«Ադրբեջանի պատճառով Հայաստանի հետ չենք կարողանում հաշտության գալ:
Պատճառը մեր սրտում է. ազերիները մեր եղբայրներն են:
Պաղեստինի պատճառով Իսրայելի հետ վատացնում ենք հարաբերությունները:
Պատճառը մեր սրտում է. պաղեստինցիները մեր եղբայրներն են:
Մի օր չտեսանք, որ մեզ համար որևէ մեկը մատը մատին տա, իսկ մենք մեզ վրա ենք վերցրել Սիրիայի ժողովրդի խնդիրը, Լիբիան լիբիացիներին է պատկանում, բայց մենք ենք այստեղից մեզ պատռում»,- դժգոհում է թուրք վերլուծաբանը:
Ավելորդ հոգսերի բեռ իրենց վտիտ ուսերին վերցնելու փոխարեն, Ռաուֆ Թամերը անհրաժեշտ է համարում, որ Թուրքիայի իշխանությունները նախ ուշադրություն ու եռանդ հատկացնեն երկրի ներսում տիրող իրավիճակին` ահաբեկչություն, արյուն, հարձակումներ, քրդերի հետ բախումներ և այլն: Ըստ նրա` օրվա հրամայական է դարձել նախ` կարգավորել ներթուրքական իրականության խնդիրները, լուծել թուրք-քրդական հակամարտությունը, ապա նոր զբաղվել արտաքին աշխարհի մանրումեծ հարցերով: Այլապես` Թուրքիայում նորմալ ապրել չի ստացվի:
Leave a Reply