Օպամա եւ Էրտողան քննած են Հայաստան-Թուրքիա յարաբերութիւնները

ՊՈԼԻՍ.- Թրքական «Զաման» օրաթերթը կը գրէ, որ Սպիտակ տան ներկայացուցիչները յայտարարած են, թէ Նիւ Եորքի մէջ Միացեալ Նահանգներու նախագահ Պարաք Օպամայի եւ Թուրքիոյ վարչապետ Ռեչեփ Թայիփ Էրտողանի միջեւ տեղի ունեցած հանդիպման ընթացքին քննարկուած է նաեւ Հայաստան-Թուրքիա յարաբերութիւններու բնականոնացման հոլովոյթը։

Նիւ Եորքի «Վոլտորֆ Ասթորիա» պանդոկին մէջ տեղի ունեցած 1.5 ժամ տեւողութեամբ հանդիպման մասնակցած են նաեւ Միացեալ Նահանգներու արտաքին գործոց նախարար Հիլըրի Քլինթըն, Թուրքիոյ փոխվարչապետ Ալի Պապաճան, արտաքին գործոց նախարար Ահմետ Տաւութօղլու, Թուրքիոյ Եւրոպական Միութեան հարցերով նախարար, Եւրոմիութեան անդամակցութեան հարցով աւագ բանագնաց Էկեմեն Պաղըշ, իշխող Արդարութիւն եւ բարգաւաճում կուսակցութեան փոխնախագահ Էօմեր Չելիք եւ Ուաշինկթընի մօտ Թուրքիոյ դեսպան Նամըք Թան։

Հանդիպման ընթացքին կողմերը քննած են Սուրիոյ, Լիպիոյ, Միջերկրական ծովու մէջ կացութիւնը, ինչպէս նաեւ թուրք-իսրայէլեան յարաբերութիւններուն, Քիւրտիստանի  բանուորական կուսակցութեան դէմ պայքարին եւ Թուրքիոյ մէջ ՆԱԹՕի հակահրթիռային վահանէն տարրերու տեղակայման առնչուող հարցեր։

http://asbarez.com/arm/110472/