Թուրքիայի Կայսերի (Կեսարիա-Ակունքի խմբ.) քաղաքի Էրջիյես համալսարանում նախորդ տարի բացված հայերեն լեզու եւ գրականությունը բաժինն այս տարի մեծ հետաքրքրություն է առաջացրել դիմորդների շրջանում։
Թուրքական Sondakika-ի փոխանցմամբ՝ Էրջիյես համալսարանի պրոռեկտոր, պրոֆ. Մեթին Հուլագուն նշել է, թե նախորդ տարվա համեմատ այս տարի դիմորդների կտրուկ աճ են արձանագրել հայոց լեզու եւ գրականություն ու եբրայերեն եւ գրականություն բաժինները։ «Հայոց լեզու եւ գրականության բաժինն այս տարի նախընտրել են 15 դիմորդ, որոնցից 12-ն արդեն ընդունվել են։ Եբրայերենի բաժինը՝ համապատասխանաբար 28 եւ 20»,-նշել է պրոռեկտորը՝ հիշեցնելով, որ նախորդ տարի հայոց լեզու եւ գրականություն բաժին է ընդունվել 6 ուսանող։
Մեթին Հուլագուն շեշտել է, թե հայ-թուրքական եւ թուրք-իսրայելական հարաբերությունների վատթարացման պարագայում իրենք սպասում էին, որ այդ բաժիները նախընտրողներն չեն լինի, սակայն եղավ հակառակը։ Ըստ Հուլագուի՝ Թուրքիան Հայաստանի եւ Իսրայելի հետ պահպանում է գործարար եւ մշակութային հարաբերությունները, որոնք թույլ կտան, որ իրենց շրջանավարտները կարողանան աշխատանք գտնել։
Նշենք, որ Էրջիյես համալսարանում հայերենի եւ եբրայերենի բաժիները բացվել են նախորդ տարի եւ միակն են Թուրքիայի համալսարանների շարքում։ Մեթին Հուլագուն ավելի վաղ արած հայտարարություններից մեկում նշել էր, թե հայերեն բաժին բացելու նպատակը՝ հայկական արխիվներում աշխատելու ունակ մասնագետներ պատրաստելն ու հայկական թեզերի դեմ պայքարելն է։
23.09.2011
Leave a Reply