Apple-ի հիմնադիր Ստիվ Ջոբսը ծագումով Մալաթիայից է: Ինչպես նշում է թուրքական «Հաբերթյուրք» պարբերականը, սույն թվականի նոյեմբերի 21-ին լույս է տեսնելու աշխարհահռչակ Ստիվ Ջոբսի կենսագրական գիրքը, որը պատկանում է նաև Ալբերտ Էնշտեյնի և Բենիամին Ֆրանկլինի կենսագրությունների հեղինակ Վոլտեր Այսեքսոնին: Միաժամանակ հրապարակվելու է նաև գրքի թուրքերեն տարբերակը: Թուրքական «Միլլիյեթի» հաղորդմամբ` գրքի որոշ հատվածներ գրվել են անձամբ Ջոբսից ստացված տեղեկությունների հիման վրա: Գրքի նախաբանում կարևոր տեղ է հատկացված Ջոբսի ընտանիքին և ծագմանը, ըստ որի` Ջոբսին որդեգրել ու մեծացրել է ծագումով հայ մի կին` Կլարա Ջոբսը, որի ամբողջական անունն է` Կլարա Հակոբյան-Ջոբս: Ստիվ Ջոբսի կենսագրական տվյալների համաձայն` Կլարան 1915 թ. Հայոց ցեղասպանությունից հետո ԱՄՆ արտագաղթած մի ընտանիքի դուստրն է: Կլարայի հոր անունն է եղել Լուիս Հակոբյան, իսկ մոր` Վիկտորիա Արթինյան: Լուիս Հակոբյանը ծնվել է 1894 թ. Մալաթիայում, իսկ Վիկտորիա Արթինյանը` 1894 թ. Իզմիրում: «Հաբերթյուրք» պարբերականը Ստիվ Ջոբսի ընտանիքի մասին տեղեկություններ ձեռք բերելու համար դիմել է Պոլսո Հայոց պատրիարքարանի հոգևոր խորհրդի նախագահ Թաթուլ Անուշյանին, սակայն վերջինս հայտնել է տվյալ ժամանակաշրջանի վերաբերյալ գրանցումներին հասու լինելու անհնարինության մասին:
Ուշագրավ է, որ սույն թուրքական հեղինակավոր լրատվամիջոցը հպարտանում է Ստիվ Ջոբսի ծագմամբ` վերջինիս` մալաթիացի հայ մի կնոջ կողմից որդեգրված լինելու փաստը ներկայացնելով որպես Թուրքիայի հետ մեծ առնչություն ունենալու հանգամանք:
22.09.2011
Leave a Reply