ԴԱԼԱՐ երգի ու պարի համույթը Գուգարաց թեմում

«Պոլսահայ համայնքի օրեր Հայաստանում» ծրագրի շրջանակներում սեպտեմբերի 19-ին Վանաձորի Շառլ Ազնավուրի անվան մշակույթի պալատում տեղի ունեցավ Ստամբուլից ժամանած Մխիթարյան Սանուց միության «Դալար» երգի ու պարի համույթի 16-21-րդ դարերի (1590-2011 թթ.) Արեւմտյան Հայաստանի տարբեր քաղաքների հայկական ավանդական 85 տարազների տողանցք-ցուցահանդեսը: Խումբը Վանաձոր այցելեց Գուգարաց թեմի առաջնորդ գերաշնորհ տեր Սեպուհ եպիսկոպոս Չուլջյանի հրավերով:

Խումբը հիմնվել է 1997 թ. հոկտեմբերին Ջուլիա Մութլունի նախաձեռնությամբ: Նա հանդիսանում է ոչ միայն խմբի գեղարվեստական ղեկավարը, այլ նաեւ հեղինակն է ցուցադրվող տարազների:

Իր գոյության կարճ ժամանակահատվածում խումբն արժանացել է բարձր գնահատանքի, քանի որ համույթը հանդիսատեսին լավագույնս ներկայացնում է հայկական հին եւ ազգային տարազներն ու պարարվեստը: Այդ է թերեւս պատճառներից մեկը, որ 2006 թ. «Դալարը» կազմեց նաեւ «Դալարիկ» խումբը, որի մասնակիցները մանուկներ են:

Հանդիսավոր միջոցառմանը բացման խոսքով հանդես եկավ տիկին Դիանա Քամբարոզյանը:

Հյուրերին ողջունեց ու բարի գալուստ մաղթեց Առաջնորդ Սրբազան Հայրը եւ գնահատանքի ու օրհնության խոսքերով մեծարեց կազմակերպիչներին, խմբի անդամներին, նորանոր հաջողություններ մաղթեց Ստամբուլում հայկական մշակույթը պանծացնող «Դալար» երգի ու պարի համույթին:

Ազգային տարազների ցուցահանդեսը հատկապես բացառիկ մի առիթ էր վանաձորցիների համար առավել լավ ծանոթանալու հայ ժողովրդի կենսակերպին, սովորույթներին, ավանդույթներին եւ ծիսական բարձրարվեստ ասեղնագործ տարազների նրբերանգներին:

Ցուցահանդես-տողանցքին Պարգեւ Գարյանը հանդես եկավ ազգագրական հայրենաշունչ երգերով: Խումբն արժանացավ վանաձորցիների ջերմ ու անկեղծ ընդունելությանը, բուռն ծափողջույնների եւ առատ ծաղկեփնջերի. դահլիճում թեւածում էր հայոց ազգային տոհմիկ մշակույթի շունչն ու ոգին:

Յուրաքանչյուր ազգի գոյատեւման եւ հարատեւման կարեւորագույն հիմնաքարերից են համարվում արվեստը, բանահյուսությունը, ճարտարապետությունը, երգն ու երաժշտությունը, որի վառ ապացույցն է «Դալար» համույթի գործունեությունը:

Երգչախմբի անդամները երկու օր իջեւանեցին թեմապատկան «Ծիծեռնակ» ճամբարի հյուրընկալ հարկի ներքո, շրջեցին Վանաձոր քաղաքում եւ Ալավերդիում եւ ապա մեկնեցին ուխտագնացության Հաղպատ, Սանահին, Սեւանավանք եւ Սեւանա լիճ: «Դալարի»` Վանաձորում երկօրյա կեցության ծախսերը հոգացել էին Առաջնորդարանն ու ԱԺ պատգամավոր, Սուրբ Գրիգոր Նարեկացի եկեղեցու խաչքավոր հարգարժան պարոն Կարեն Սարիբեկյանը:

Միջոցառմանը ներկա էին մարզի մշակութային հաստատությունների, մարզային եւ քաղաքային իշխանության ներկայացուցիչներ, դասախոսներ, ուսուցիչներ, ուսանողներ, աշակերտներ եւ արվեստասեր հասարակություն:

«ԱԶԳ» ՕՐԱԹԵՐԹ #167

 21-09-2011